“Dalaruma ha'u haree, ha'u-nia kolega mai ho fuuk naruk, mane mós fuuk naruk hanesan feto, tilun mós iha brinkus hotu liman ain isin tatto hotu situasaun sira ne'e preokupa tebes iha ita-nia komunidade, ha'u hanoin ida ne'e komprímisu ami sei tau ba kritéria rekrutamentu nian”, dehan Alito Soares iha HNGV hafoin simu tomada pose, segunda (26/07).

Maske tatto hanesan arte ida ne’ebé pesoál balun hakarak utiliza sira-nia isin hodi pinta, maibé ida ne’e sei regula no tau iha kritériu bainhira halo rekrutamentu ba pesoál saúde foun atu servisu iha ospitál.

Aliende ne’e, preokupa mós pesoál saúde ne’ebé durante ne’e atende pasiénte sira iha ospitál Nasionál la uniforme, hodi hetan kritika husi pasiénte sira.

“Assuntu ida ne'ebé ke la'ós siénsia nian maibé sensitivu, etika komunikasaun uniforma, loron ida ha'u on call ha'u ba iha Emerjénsia ne'ebá hatais de'it farda operasaun nian, ha'u hasoru pasiénte planu atu opera, pasiénte husu botamak ne'e sé mak ne'e?. Isin kotuk tan krekas tan se mak ne'e?. Situasuan sira ne'e ba ha'u uniforme ne'e ba ha'u importante tebetebes ba servidór sira iha ospitál”, afirma nia.

Tanba ne’e husu atu labele mai ho kór ketak ketak balun kor azul balun kór mean tanba étika komunikasaun presiza tau atensaun mós situasaun sira hanesan ne’e. (*)