“Ha'u atu dehan de'it, ita lalika pániku, Oekussi lakohi pániku, komunidade importante koopera dezinfeta sira-nia uma, halo vasina teste inus, depois vida ne'e la'o normál. Ha'u lakohi eskola taka, lakohi eskola labele hala'o missa, maibé kooperasaun husi komunidade ida de'it, ba vasina”, dehan Arsénio Bano, iha rezidénsia PM, Taur Matan Ruak, Farol, segunda (02/08).
Maske pasiénte na'in-4 ne'ebé autoridade saúde sira deteta pozitivu Variante Delta iha Suku Ne'e-Meko, liuhusi ema ida ba halo konsulta iha sentru saúde.
Hafoin deteta ba kazu foun 4 ne’e, autoridade hahú kedas ho medida prevensaun, halo dezinfeta área refere, halo teste massal, buka tuir istória viajen moras ne'e.
“Bele husi nasaun viziñu, bele mós husi maluk sira husi Dili ba. Tanba vasina ne'e, sira dala-rua bele hetan pozitivu nafatin, tanba ami hetan kazu rua iha Oekussi ne'e, vasina dala-rua ona mais sira pozitivu. Mais sira la'o iha komunidade ona”, dehan nia.
Tuir tarjetu, populasaun iha RAEOA tenke simu vasina to'o pursentu 41 (41%), maibé dadaun ne'e ema pursentu 15 (15%) mak foin simu vasina.
“Iha foho ne'ebá, iha Oekussi, balu lakohi vasina tanba dehan oan sira iha ne'e (Dili), telefone ba dehan lalika vasina, sé vasina lalais ona, oras ida mate lalais”, dehan nia.
Tanba ne'e, husu ba populsaun sira iha Oekussi atu akonsella malu, liliu estudante sira atu enkoraja ema hotu bele partisipa iha programa nasionál vasinasaun kontra Covid-19 iha Timor-Leste. (*)
