"Objetivu husi Kampaña nasionál vasinasaun Covid-19 iha Postu Administrativu Laklo ne'e atu enkoraja partisipasaun komunidade sira -nian to’o iha nível Postu no Aldeia, hodi simu vasina ho másimu hodi bele proteze-an husi Covid-19, nune’e bele redúz risku propagasaun vírus refere", dehan Ministru Francisco Martins iha aldeia Labubu, Suku Laku Mesak, Postu Administrativu Laklo, Munisípiu Manatutu, rersa (31/08).
Tanba Kampaña vasinasaun sai prioridade ida atubele hakbesik-an ba komunidade sira hodi esplika ho loloos objetivu husi vasina ne’e rasik, atu halo mitigasaun hodi rezolve problema atu labele afeta ba komunidade sira.
Nune'e MAPKomS husu ba komunidade iha suku Laku Mesak tomak atu hakbesik-an nafatin ba sentru vasinasaun Covid-19 nia, atubele salva-an, salva família no salva Timor-Leste husi moras Covid-19 ho nia variante foun.
Koordenadora Jerál Covid-19, Odete da Silva Veigas hatete, Kampaña Nasionál Vasinasaun Covid-19 ne'e, oinsá atu hakbesik-an ba komunidade sira hodi fó informasaun ho lolos nune'e sira bele ativu iha vasina hodi luta hasoru pandemia Covid-19 ho nia variante foun.
Tanba ne'e husu ba komunidade atu koopera ho parte saúde hodi simu vasinasaun nune’e bele hadook-an husi vírus mortál ne’e no kontribui ba redusaun númeru kazu iha Timor-Leste.
Administradór Postu Administrativu Laklo, Samuel Rodrigues Pereira hatete, iha aldeia Labubu seidauk rejista komunidade ne’ebé infetadu ho Covid-19 maibé nafatin apela ba komunidade atu hakbesik-an ba sentru saúde hodi simu vasinasaun nune’e bele salva-an no família husi moras kontajioza ne’e. (*)
