"Atu estende ka la estende tan ne'e, uluk ami sempre kestiona ne'e iha fronteira mak ita tenke tau, mais iha laran ne'e tenke husik livre. tanba ita observa situasaun ida agora, ita-nia povu sira dadauk hela ho terus, araska. Dalan ne'e taka ba ita-nia populasaun sira, mais ita ida boot livre ba ne'ebe de'it,. Entaun buat ida ne'e, ita duni mak sei kria moras ne'e, tanba saida mak hau dehan ita rasik sei kria moras ida ne'e, tanba ita rasik mak hakarak hatama moras ida ne'e mai", dehan nia iha Parlamentu Nasionál, segunda (06/09).

Nu'udar opozisaun, ko'alia tuir realidade no faktu, tanba komunidade sira komesa kestiona, Governu aplika konfinamentu jerál bandu komunidade lori modo husi munisípiu ida ba munisípiu seluk hodi fa'an, maibé aviaun husi nasaun seluk tama mai sai Timor-Leste.

Atu evita konfinamentu jerál iha Dili, CNRT haree katak importante ba Governu labele loke taka fronteira maibé orienta tan membru forsa no polisia sira ne'ebé iha Dili la halo servisu, koloka sira ba hotu iha fronteira, hodi fó subsídiu ba sira atu hein fronteira durante oras 24.

Durante pesoál seguransa sira iha fronteira seidauk sufisiénte tanba faktu hatudu maske Governu taka metin fronteira, maibé realidade autoridade husi Indonézia nian sempre halo kapturasaun ba sidadaun timoroan husi atus-lima to'o atus-neen.

"Estende bele estende maibé estende mak Estadu Emerjénsia, la'ós atu aplika fali konfinamentu obrigatóriu, ka atu lockdown ka serka sanitária iha fatin hothotu, ida ne'e di'ak liu ita evita ida ne'e para labele iha, pelumenus fó sirkulasaun ba ita-nia populasaun sira hodi bele buka sira-nia moris", dehan nia.

Xefe Bankada Frente Revolusionáriu Timor-Leste no Independente (FRETILIN), Francisco Miranda Branco konsidera, Konfinamentu Domesiliáru Jerál ne'ebé Governu aplika iha semana ikus ne'e konsege redus ona númeru kazu pozitivu covid-19.

Tanba ne'e, husu Governu bainhira hasai desizaun saida de'it tenke bazeia ba dadus ne'ebé mai husi sala situasaun-Sentru Intergradu Jestaun ba Krize (SIJK).

"Se haree ba situasaun ida agora, kazu pozitivu tun ne'e, ami hanoin Governu bele haree didi'ak, hodi estuda ida ne'e", dehan nia. (*)