"Dadaun ne'e dadus ne'ebé tama mai iha ami-nia fatin hamutuk 5000 ital, ida ne'e ita tenke verifika didi’ak, no aban ami sei tuur hamutuk ho Diretór Munisípiu sira atubele haree fali sira-nia dadus ida-idak, nune'e ita la bele husik ema ruma la hetan, no ita asegura katak munisípiu sira tenke identifika ninia ema ne'e loloos, tama iha kategória ida ne'ebé, tanba iha ne'eba iha kategória lubuk ida", dehan nia iha Ótel Novu Turizmu Lesidere, tersa (21/09).

Tanba Pesoál saúde barak los, presiza halo verifikasaun ba sira-nia lista prezensa ka ordem servisu nune'e bele halo prosesu pagamentu, tanba ne'e kondisaun ida atubele hetan pagamentu.

"Ita tenke verifika didi'ak no kompleta dokumentu sira ne'e, atu haruka ba Ministériu Finansas nune'e sira bele hetan sira-nia direitu, no importante katak sira-nia direitu ne'e la bele lakon", dehan nia.

Ba kategória sira ne'e hanesan sira ne'ebé servisu iha izolamentu, sira ne'ebé la servisu iha izolamentu maibé nia iha risku atubele kontamina husi moras, ekipa ida servisu apoiu nian, ekipa ida ba vasinasaun nian, ekipa kondutór sira, tenke koloka didi'ak sira-nia fatin tanba osan simu la hanesan, la bele kahur, se kahur mak balu simu liu balu simu menus bele hamosu problema.

"Ita tenke koloka ema iha fatin ne'ebé lolos, se la’e nia servisu iha izolamentu ita tau fali ba fatin seluk ne'e bele iha problema ona, tanba ne'e ita tenke servisu hamutuk ho Diretór Saúde Munisípiu sira, Ospitál sira no Diretór Nasionál sira atu haree didi'ak sira-nia ema ne'ebé envolve iha prevensaun mitigasaun Covid-19 ne'e, nune'e to'o pagamentu ne'e la bele prejudika fali ema ruma", haktenik nia. (*)