"Ministra ami kontente los, apresia ho situasaun Covid-19 ida ne'e, ita-boot nia desizaun para bele husik hela uma rua, ne'ebé fazparte ba dezenvolvimentu iha Munisípiu Aileu", dehan nia hafoin serimónia inaugurasaun sala izolamentu ho fatin laboratóriu iha Aileu Vila, kuarta (22/09).

 Tanba, esforsu hotu ne’ebé halo moras ne'e sei redus duni nia ezistensia iha rai laran nomós iha Munisípiu Aileu.

"Alende ida ne'e ho prezensa moras ida ne'e, bele husik hela dezenvolvimentu mós ba ami-nia Munisípiu Aileu, tan ida ne'e hakarak agradese ba desizaun Ministra nian ba asuntu ida ne'e", hatete nia.

Ministra Saúde, Odete Maria Freitas Belo hatete, sira lakoi sidadaun tama iha ospitál tanba nasaun ki’ik tebtebes, foin mak hari’i ho ekipamentu, fasilidade ho konstrusaun ne'ebé menus, karik husi populasaun Aileu mak moras hotu fatin labele aguenta.

"Ohin ita halo inaugurasaun ba ita-nia izolamentu ho 25 kama no 25 kama de'it moras mai liu 25 ba tau iha ne'ebé, professionál saúde ba tau iha ne'ebé, hela fatin ne'ebé, taun tenke buka ótel buka fatin atubele koloka pesoál sira ne'ebé moras ho Covid-19", dehan nia.

Diretór Servisu Munisipál Saúde Aileu, Julio dos Santos dehan, Munisípiu Aileu durante ne'e atende hela kazu Covid-19 ho fasilidade ne'ebé naton, hetan apoiu direta husi administradór liuhusi diretór agrikultór oferese uma ida ho fasilidade Kama 10  hodi atende hela komunidade iha Munisípiu Aileu.

"Ohin agradese ba VIII Governu liuhusi Ministeriu Saúde bele oferese izolamentu nomós mini laboratóriu ida mai Munisípiu Aileu ho nune'e bele atende ami-nia komunidade di'ak liután iha futuru", afirma nia.

Maske fasilidade seidauk kompletu maibé hanesan Diretór nafatin buka solusaun hamutuk ho Ministériu ho Diretór Nasionál sira hotu atu kompleta.

Ba konstrusaun ne'e, hetan apoiu husi Governu liuhusi Fundu Covid nian ne’ebé Ministériu saúde rasik mak jere no aplikasaun direta ba  kompaña. (*)