"Ha'u hameno oituan de'it ba joven sira, katak joven ne'ebé mak nia naran tama iha sistema, naran atu ba servisu iha rai liur hanesan Austrália karik, dalan seluk laiha, agora kedas tenke ser tuir vasina AstraZeneca dala-rua”, deklara Alarico de Rosário, iha Kaikoli, tersa (28/09).

Bainhira kandidatu traballadór timoroan sira ne'ebé naran liu ka pasa ona iha faze selesaun no rejístadu iha sistema, husu atu aprezenta kartaun Vasina AstraZeneca ne'ebé kompleta ona doze daruak.

"Kuandu sira ne'ebé mak tuir hotu, sira ne'ebé mak naran iha sistema karik, lori sira-nia kartaun ne'e ba atu aprezenta iha over size atu rejistu iha sistema ne'e para kuandu ema Austrália husu karik, kritéria ida primeiru mak vasina dala-rua”, dehan nia.

Tanba tuir kritériu dahuluk ne'ebé estabelese husi Governu Austrália katak, ho situasaun pandemia Covid-19 ne'e, la autoriza sidadaun sira ne'ebé simu vasina Sinovac atu tama iha territóriu Austrália.

"Ha'u hatete ba kolega sira hotu, Austrália sira hakarak mak AstraZeneca. Sé Sinovac, ema nia kritéria, ita labele halo buat ida, tanba la'ós ita mak halo kritéria, ema nia nasaun mak halo kritéria, ita halo tuir de'it. Ne'e la'ós ita rekruta iha ne'e atu ba servisu iha Aileu, la’e. Ne'e servisu iha Austrália, ne'ebé ita tenke ser tuir sira-nia regra”, haktenik Alarico.

Maibé to'o oras ne'e, SEFOPE seidauk simu pedidu ruma husi Governu Austrália hodi husu kona-ba traballadór timoroan sira atu ba servisu

"Seidauk iha informasaun ida atu ba Austrália, ne'e seidauk. So ke iha buat balu que ita tenke ser servisu kontinuasaun tanba ita labele hein to'o bainhira Austrália presiza mak ita buka ema ba servisu laiha. Agora ne'e ita prepara oinsá para aban-bainrua ema loke karik, bele fasilita joven sura bele ba servisu iha Austrália, afirma nia.

Tuir dadus, totál traballadór timoroan sira ne'ebé servisu hela iha nasaun Austrália, hamutuk ema rihun-ida-atustolu-resin (1300). (*)