"Inan-aman sira tenke hatene importánsia husi vasinasaun ida ne’e hodi salva ita-nia vida, tanba moras ne’e halo ema mate barak ona, ita-nia rain husi tinan kotuk to’o agora ema mate iha atus-ida-sanulu-resin-hitu (117), tanba ne’e ami mai iha ne’e atu esplika loloos ba povu Aileu sira katak, moras ida ne’e la’ós afeta de’it iha Timor, maibé iha mundu tomak, tanba ne’e iha rai seluk, ema barak mak simu ona vasina hodi bele iha imunidade forte hodi luta hasoru moras ne’e”, dehan Ministru Francisco Martins, iha Merkadu Aileu, sábadu (02/10).
Tanba ne’e, husu ba komunidade Aileu tenke simu vasina atu haforsa imunidade komunitária hahú husi aldeia, suku no fatin públiku sira, atubele laIo ba mai ho livre ba nesesidade ekonomia, liliu fa’an sasán no lori produtu lokál ba fa’an.
“Ha’u mai la’ós atu hata’uk inan-aman sira, maibé fó hanoin no konvense ita-boot sira bele hakbesik-an ba sentru saúde atubele simu vasinasaun”, esplika nia.
Vasina ne’e programa mundiál, Governu ida ne’e mós prontu atu investe hodi salva nia populasaun sira.
Kontribuisaun boot ida ne’ebé presiza fó iha tempu difísil hasoru pandemia globál COVID-19 mak sidadaun hotu ho idade tinan 18 ba leten, tenke simu vasina, hanesan ho luta ne’ebé hatudu ona iha tempu rezisténsia uainhira kontra inimigu hakotu rejime ditadura iha Timor-Leste.
Sekretáriu Estadu Arte no Kumtura (SEAK), Teófilo Caldas, konvense povu Aileu liuhusi istória pasadu bainhira Timor-Leste seidauk ukun-an, hodi sadik populasaun sira bele luta hasoru inimigu invizivel ne’e.
“Aileu labele lakon ho munisípiu seluk, tanba iha 1975, Aileu mak sai knuuk baze apoiu nian hodi halibur líder nasionál sira atu luta ba ukun rasik-an, tanba saida to’o agora mak Aileu labele partisipa másima iha programa vasinasaun”, dehan nia.
Nune'e nia enkoraja komúnidade Aileu tenke hatudu ezemplu ba munisípiu seluk katak iha ukun-an, Aileu mós nafatin sai sentru ba populasaun hodi simu vasinasaun atubele proteje vida komunidade nian.
Marka prezensa iha kampaña ne’e, Diretór DNDI-MAPKOMS, Administradór Postu Administrativu Aileu Villa, Komandante PNTL munisípiu no komandante Eskuadra sira, reprezentante Ministériu Saúde, líder komunitáriu, pesoál saúde nomós hetan partisipasaun másima husi komunidade sira. (*)