“Sim, desizaun ohin (08/10) foti ona katak deputadu sira hahú iha sesta semana oin, sira sei ba intergra iha kampaña vasina nian hamutuk ho membru Governu sira ne'ebé mak tutela iha área ka Munisípiu tolu, (Ermera, Bobonaro, ho Ainaro)”, dehan Ministru Asuntu Parlamentar no Komunisaun Sosiál (MAPKomS), Francisco Martins Jerónimo, iha PN, sesta (08/10).
Pozisaun deputadu sira hodi apoiu halo kampaña vasinasaun ne'e, tanba iha Munisípiu tolu mak to'o agora sira-nia vasinasaun kontinua menus husi pursentu limanolu (50%). Purtantu iha munisípiu seluk ne'e númeru ema vasina liu ona pursentu lima-nulu (%50).
Ho ida ne'e, Prezidente Parlamentu Nasionál, Aniceto Longuinhos Guterres Lopes, konvida Ministériu Saúde no Ministériu Asuntu Parlamentár no Komunisaun Sosiál atu hasoru malu hodi define oinsá deputadu sira intergra iha kampaña Vasina nian ne'ebé mak durante ne'e membru Governu sira halo iha baze.
Tanba to'o oras ne'e munisípiu hanesan Ermera, Bobonaro, no Ainaro mak seidauk atinje persentajen vasina to'o pursentu 50. Razaun ida ne'e mak deputadu sira preokupa no buka dalan atu apoiu kamapaña vasinasaun husi Governu.
“Saida mak ami deside iha ne'e, la'ós komisaun F de'it, maibé deputadu hothotu ne'ebé mak iha interese hakarak hamutuk ho membru Governu sira ba halo kampaña vasina nian ba ita-nia komunidade”, dehan nia. (*)