Print this page

Laiha Eletrisidade, Komunidade Haufu Fasil Konsumu Informasaun Hoax

By October 11, 2021 930
Eletrisidade Timor-Leste. Eletrisidade Timor-Leste. Foto Suplay

Tempotimor (Ermera)-Konsellu Suku Haufú, Postu Administrativu Letefoho, Munisípiu Ermera, Felis dos Santos hatete, komunidade suku Haufú durante ne’e fasil atu konsumu infomasaun falsu (hoax), tanba laiha ahi-eletrisidade hodi bele asesu informasaun kona-ba Vasinasaun kontra Covid-19.

“Ha'u husu ba na’in-ulun sira  buka medida oinsá para informasaun falsu sira ne'e labele to’o iha ami-nia suku, tanba ami-nia suku ne'e laiha liña eletrisidade entaun komunidade maioria fiar informasaun falsu nune'e sira lakohi simu vasina”, dehan Felis dos Santos, bainhira partisipa iha kampaña nasionál vasinasaun Covid-19 iha Letefoho, segunda (11/10).

Ho informasaun falsu ne’ebé komunidade sira konsumu halo sira barak mak lakohi vasina ho nia impaktu mak halo ema sei mate nafatin ho Covid-19.

Primeiru Ministru (PM), Taur Matan Ruak hatete, Eletrisidade Timor-Leste sai ona empreza publiku, no tuir planu ne'ebéiha, antes tinan 2022 remata suku hamutuk 74 iha territóriu sei asesu liña eletrisidade inklui Suku Haufú.

"Eletrisidade la to’o suku entaun fasilmente ema Konsumu 'Hoax' ne'e ha'u konkorda duni ho maun Felis nia liafuan, maibé eletrisidade iha Timor tomak ne'e suku 74 mak seidauk asesu, dadaun ne'e EDTL sai ona empreza públika, nune'e tuir planu antes tinan ne'e remata no tinan oin remata suku sira hotu ne'e asesu hotu ona liña eletrisidade, espera suku Haufú mós inklui ona”, dehan Taur. (*)

Rate this item
(0 votes)
Last modified on Monday, 11 October 2021 20:44
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items