"Rezultadu monitorizasaun ba fatin vasina iha 11 munisípiu inklui RAEOA, hatudu taxa partisipasaun boot liu iha munisípiu sira iha semana ida ne’e nia laran, Dili pursentu 18, 28, Ermera pursentu 16, 79, Covalima pursentu 9,72, RAEOA pursentu 9, 61 no Vikeké pursentu 9,41", dehan nia iha edifísiu FONGTIL, Kaikoli, segunda (25/10) .
Haree husi gráfiku taxa partisipasaun feto ho mane iha vasina, feto 49, pursentu 73, kompara ho taxa partisipasaun vasina mane pursentu 46, 26, ema ho defisiénsia hetan pursentu 0, 17, tanba semana ne’e feto partisipa barak liu mai husi munisípiu, Likisá, Ainaru, Manatutu, Vikeké no Lautein.
"Ho taxa partisipasaun sira ne’e FONGTIL rekomenda ba Governu liuhusi ministériu saúde, no parlamentu nasionál komisaun F, atu halo fiskalizasaun no monitorizasaun ba fasilidade saúde sira", hatutan nia.
Ministériu Saúde (MS) kontinua halo kolaborasaun ho liña ministeriál sira ne’ebé halo kampaña vasina iha munisípiu, tenke foku ba estratéjia no aprosimasaun komunidade nian oinsá konvense, komunidade atubele komprende didi’ak importánsia husi vasina.
"Presiza fó atensaun ba fasilidade no lojístika aumenta jeleira ou Cool box hodi rai ai-moruk vasina, iha sentru saúde sira, atu asegura ai-moruk nia kualidade vasina”, dehan nia.
Ministériu Saúde, presiza aprosima ferik no katuas sira hodi simu vasina, nune’e bele hasa’e imunidade ferik no katuas sira nian, presiza halo kampaña iha fatin rurál sira, no presiza koordenadór hamutuk ho Ministériu Obras Públika (MOP) liuhusi EDTL,ep, atu asegura nafatin eletrisidade iha Timor laran tomak.
Husi loron 18 to’o 20 Outubru 2021, partisipasaun komunidade ba vasina sa’e maka’as, husi fatin monitorizasaun 41 ekipa sosiedade sivíl halo monitorizasaun deskobre katak husi komunidade hamutuk 5.640 mak partisipa iha vasina. (*)