Print this page

Komunidade Lospalos Hahú Ataka Loja hodi Sosa Fo'os

Produtu lokal husi Timor Leste ne'ebe komunidade sira fa'an iha Merkadu Taibese Produtu lokal husi Timor Leste ne'ebe komunidade sira fa'an iha Merkadu Taibese Foto tempotimor.com

Tempotimor (Dili)-Komunidade sira iha Lospalos, Munisipiu Lautem iha Tersa (17/03) hahú hada'u-malu sosa foos iha loja sira iha kapital Lospalos. Situasaun ida ne'e mosu hafoin governu hato'o pedidu estadu emerjensia ba Prezidente Repúblika Francisco Guterres Lu Olo.

Tuir informasaun husi komunidade ida, Maurecio Cristovão, komunidade sira hahú ataka loja sira iha Lospalos hodi sosa foos tanba informasaun ne'ebé sira rona katak fronteira Timor Leste ho Indonezia taka ona no iha tempu badak estadu TL sei taka an mós relasiona ho ameasa husi Corona Virus 2019 (Covid-19).

Maurecio konta, ohin dader nia ba ona iha loja ida besik nia hela fatin hodi sosa foos kilograma 20 karon tolu ho folin $10 kada karon.

Ida ne'e, nia hatete, hanesan antisipasaun ida ne'ebé nia halo karik mosu duni situasaun ne'ebé la espera.

"Iha ne'e informasaun mosu dehan fronteira Timor Leste ho Indonezia taka ona ne'ebé ha'u deside sosa foos atu bele aguenta karik mosu situasaun ne'ebé ita hotu la espera," dehan nia ba tempotimor.com via telefone, Tersa (17/03).

Nia hatutan, komunidade barak mak hahú hada'u-malu sosa foos tanba tauk mós iha loron hirak tuir mai folin foos sei sa'e.

Iha fatin ketak, komunidade seluk, Natercia Samora, dehan, kuaze foos ne'ebé fa'an iha loja sira iha kapital Lospalos hotu ona, tanba ema barak mak mai sosa.

"Ha'u konsege sosa foos kilograma 25 karon rua (2) ho folin $20. Ami tauk karik estadu deklara izola an duni nesesidade baziku sira sei la tama no karik iha mós nia folin sa'e no ami laiha kbiit atu sosa," dehan Natercia.

Tuir informasaun, daudauk ne'e komunidade barak mak sei forma hela iha loja sira ne'ebé nia stok foos sei iha hodi bele sosa foos.

Entretantu, tuir informasaun to'o iha tuku 13.23 loja boot ida iha kapital Lospalos nia stok foos hotu no komunidade balun ne'ebé forma ona atu sosa foos tenke fila ho liman mamuk.

Rate this item
(3 votes)
Last modified on Tuesday, 17 March 2020 13:59
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items