Liuhusi karta despaisu númeru 08/A.M Lautém/III/2021 ne'ebé fó sai hafoin reuniaun ekipa konjunta AML deside pontu sira hanesan, ema hotuhotu iha fatin ne'ebé de’it Munisípiu Lautein atu kumpri regra prevensaun Covid-19 hanesan uza máskra, fase liman ho sabaun no distánsia sosiál.
"Suspende serkulasaun ema tama-sai husi área geográfika suku Home to'o dia 29 Marsu 2021," hakerek karta abaixu asinadu hosi AML, Domingos Savio ne'ebé www.tempotimor.com asesu, tersa (23/03).
Provizóriumente suspende atividade ne'ebé fó atendimentu ba ema barak to’o loron 29 fulan-marsu 2021, suspende ema halibur malu iha grupu barak hanesan futu-manu, tipu jogu oinoin, treinu inklui lia mate-moris tuir tradisaun no kontrola sirkulasaun ema tama-sai iha área turistiku sira.
Desizaun suspende atividade hirak refere bazeia ba deklarasaun Estadu Emerjénsia (EE) no dekretu Prezidente Repúblika (PR) númeru 15/2021 data 1 marsu no dekretu governu númeru 6/2021 data 02 Marsu kona-bá medida ezekusaun ba deklarasaun EE nian relasiona ho Pandemia covid-19.
Munisípiu Lautein rasik deteta kazu pozitivu Covid-19 ida (1) bainhira suspeitu estudante husi Universidade Oriental Timor Lorosa’e (UNITAL) viajen husi Dili iha loron 18 fulan-marsu hela iha Aldeia Reisoru, suku Home, Postu Administrativu Lospalos, Munisípiu Lautein.(*)
