Ezijensia ne'e mosu hafoin SIJK konfirma katak profesor portugues ne'ebé hanorin estudante sira iha Munisipiu Likisa pozitivu Corona Virus Deasses 2019 (Covid-19).

Preokupasaun sai boot liu tan, tanba maske tuir defenisaun kontatu besik husi Organizasaun Saúde Mundial katak ema ne'ebé iha risku boot hetan daet Covid-19 mak ema ne'ebé halo kontaktu besik ho kazu pozitivu loron 2 antes to’o loron 14 hafoin ema pozitivu ne’e hetan sintomas, maibé profesor husi Portugal ne'ebé pozitivu Covid-19 durante ne'e la hatudu sintomas.

Inan-aman estudante sira preokupa tanba laiha esplikasaun klaru husi SIJK kona-ba profesor ne'e hetan virus husi ne'ebé no tuir kalkulasaun mediku nian virus ne'e moris ona iha sira-nia isin hahú iha sa data.

Inan-aman estudante, Antoninho da Silva Pinto ne'ebé nia oan na'in tolu eskola iha CAFE, preokupa tebes ho situasaun ne'ebé daudauk ne'e mosu relasiona ho profesor husi Portugal ne'ebé pozitivu Covid-19.

Husi nia oan na'in tolu ne'ebé eskola iha CAFE, Antoninho dehan, nia oan na'in ida mak halo ona kontatu besik ho profesor husi Portugal.

"Profesór ne'e hanorin to'o data ne'ebé mak ha'u haree iha ha'u-nia oan nia kadernu ne'e, nia tama ikus iha dia 13 Marsu," dehan Antoninho ba www.tempotimor.com iha nia hela fatin, Likisa, Kuarta (22/04).

Ho situasaun ne'e, Antoninho hahú tauk karik virus ne'e moris ona iha nia oan ninia isin no bele hadaet ba membru familia tomak.

"Se ami-nia oan sira mak iha ona signifika hadaet tutan ba ami," dehan nia.

Aleinde nia oan na'in ida halo ona kontatu ho profesor husi Portugal, nia dehan, nia feen mós kontatu ona profesor bainhira ba haree sira-nia oan ninia naran iha profesor nia laptop.

"Ha'u-nia ferik-oan ba tuir enkontru labarik sira nian, no ha'u-nia ferik-oan dehan sira halo komunikasaun ho profesór (husi Portugal) ida naran M**, tanba ba chek ami-nia oan ida pre-eskolar ne'e nia naran iha laptop, entaun sira hamutuk besik malu."

Tan ne'e, tuir nia, presiza tebes atu halo teste ba estudante sira, profesor sira, inklui inan-aman ne'ebé halo ona kontatu ho profesor husi Portugal.

"Hanesan inan-aman (teste) ida ne'e urjente, tanba atu salva, tanba konsidera ami tama risku ona," dehan nia.

Iha fatin ketak, inan husi estudante CAFE ho inisial A sente preokupa mós tanba nia oan na'in tolu mak eskola iha CAFE.

Nia sente laran taridu tanba nia oan-feto ida mak profesor husi Portugal ida hanorin. Profesor ne'e fila ona ba Portugal.

"Profesor ida pozitivu Covid-19 iha Portugal ne'e keta profesor ne'ebé hanorin ha'u-nia oan-feto ne'e karik," dehan nia.

Inan ne'e hein katak, profesor ne'ebé hanorin nia oan-feto la'os profesor ne'ebé konfirmadu pozitivu Covid-19.

Tan ne'e, nia ezije mós ba parte saúde atu tuun ba hodi halo teste ba estudante sira no ema sira ne'ebé halo ona kontatu besik ho profesor sira husi Portugal.

Iha Parte seluk Portavoz SIJK, Odete da Silva Viegas hatete, SIJK orienta ona parte saúde Mmunisípiu Likisa atu halo screening ba pasiente sira ne'ebé mai konsulta iha Sentru Saúde.

"Horseik ami mos fó ona orientasaun ba iha Diretora Saude Munisípiu Likisa atu halo mós screening ba pasiente hotu-hotu ne'ebé mak ba halo konsulta, karik iha inus-been, isin-manas, atu bele anota no foti istória, atu nune'e komunika mai vijilánsia epidemiolojia no mós laboratóriu," dehan nia iha Sala Situasaun Sentru Konvensaun Dili, Kuarta (22/04).

 

Entretantu, liu husi telefone, jornalista www.tempotimor.com tenta atu dada-lia ho responsavel CAFE, maibé responsavel ne'e rekuza hodi fó komentariu.