PR deklara asuntu ne’e liuhusi diskursu komemorasaun loron proklamasaun independensia ba dala 45 iha Pilila Munisipiu Likisa, Sábadu (28/11).
“Ita konsege haka’at krize polítika ida ne’e bainhira partidu FRETILIN deside viabiliza VIII Governu no Primeiru-Ministru deside kaer nafatin ninia knaar iha momentu ne’ebé Estadu Timor-Leste tomak hasoru situasaun kalamidade públika ho konsekuénsia ekonómika aat tebes. Ita konsege hetan solusaun tanba dever serví Povu no sentidu Estadu sei maka’as nafatin iha líder sira ne’ebé lidera partidu polítiku sira ne’ebé sustenta VIII Governu ohinloron”, Xefe estadu deklara.
Nia dehan, ho krize polítika sira ne’ebé nasaun ne’e hasoru ona, bele haree katak importante tebes ba Timor-Leste katak partidu polítiku sira, líder polítiku sira no personalidade sira ho influénsia iha komunidade tenke iha vontade atu hetan solusaun ba problema ne’ebé de’it.
Nia fó ezemplu katak, hanesan iha tempu luta, presiza iha líder-modelu atu ema hotu haktuir, atu ema hotu bele kaer metin nafatin iha timor-oan hotu nia moris, nu’udar Povu no Nasaun.
“Ita presiza haburas filafali fiar ba malu, ho onestidade no integridade, atu bele hametin konsensu nasionál hodi haforsa Estadu Direitu Demokrátiku, haburas dezenvolvimentu sustentadu no sustentável, hasa’e kreximentu ekonómiku iha rai-laran; hala’o jestaun ho rigor, transparénsia, efikásia no efisiénsia ba Fundu Minarai atu ita-nia oan no bei-oan sira bele hetan mós benefísius”, nia fó hanoin.
Ne’e katak Fundu Minarai ne’e tenke fó rezultadu di’ak mai Timor-Leste; konsensu ida ne’e tenke haree mós ba edukasaun nu’udar garante ba futuru dignu no prósperu ba oan no bei-oan sira; konsensu atu hadi’ak di’akliu sistema saúde no ninia servisus ba komunidade sira atu populasaun bele sai saudável no prodús liután; konsensu atu dezenvolve maka’as liu agrikultura, nu’ udar baze ba ita-nia ekonomia nasionál, atu agrikultor sira sai produtivu liu no prodús hahán ho kualidade aas no sai fonte rendimentu seguru ba komunidade rurál sira no garante seguransa alimentar iha tempu ne’ebé de’it; konsensu kona-ba justisa sosial, katak mane no feto iha direitu no oportunidade hanesan.
Katak diferensa ne’ebé de’it, hanesan relijiaun, rasa, etnia no seluk tan labele haketak ema husi ema maibé hariku liután timoroan hotu nu’udar Família Boot ida, moris iha uma lisan boot ida de’it: Timor-Leste! Timoroan hotu labele fó fatin ba rasismu iha Rai-laran! (*)
PUBLISIDADE
