Administradór munisípiu Mantuto, Fernando Sousa informa, einjeral kondisaun estrada iha postu administrativu sira iha munisipiu Manatuto seidauk bele konsidera diak, tanba maske iha fatin balun kondisaun estrada diak ona, maibé iha fatin seluk sei iha problema.
“Manatuto Villa laran ho Laleia ita bele dehan sira ne'e di'ak ona, no Natarbora mós hanesan ita hotu-hotu hatene estrada diak, só que iha 2019 momentu iha temporária ida udan boot, iha ponte ida iha mota Lamaran ne'e mak kotu total, ami hato'o ona ba obras públika par tau iha konsiderasaun mós atu bele hadi'a fila fali ponte ne'e,” dehan nia ba www.tempotimor.com iha nia knar-fatin, Sau-Manatuto, Tersa (08/09).
Maibé, nia dehan, estrada ligasaun ba postu administrativu seluk hanesan Laklo, Laklubar, no Soibada seidauk diak.
“Ba postu Laklo, agora dadauk halo hela ami-nia preparativus, sira mai sukat dadaun, espera katak iha 2021 sira bele implementa ona reabilitasaun estrada husi Obrato ba iha postu administrativu Laklo,” dehan Fernando.
Estrada ba Laklubar, nia dehan, husi kurzamentu Rulalan iha aldeia Le'i nian ligasaun ba to'o iha postu Laklubar laran seidauk hadi'a.
Ba postu Soibada, nia hatete, prosesu hahú lao ona, maibé sei hein instalasaun ponte iha mota Sahe, bainhira konstrusaun finaliza ona, estrada sira sei hadi'a hotu.
Iha fatin seluk, Administradór postu administrativu Manatuto Villa, Gaspar Henriques da Silva hatoo preokupasaun husi komunidade sira iha suku sira iha postu Manatuto Villa nian hanesan Ma'abat, Aiteas, Sau, Ai-lili, Iliheu no Kríbas. Nia dehna, komunidade sira-nia preokupasaun barak liu kona-ba bee-moos, fasilidade saúde, eskola, no balun kona-ba idózus nian.
“Agora, populasaun ne'ebé preukupa tebes kona-ba bee-moos ne'e ida mak suku Iliheu, aldeia Rembor rasik no mós iha suku Kribás ne'ebé mak fornesimentu bee-moos la sufisiente, maibé nia solusaun mak ami koko hadi'a sistema planeamentu ami nian ne'ebé tenke buka bee-matan ne'ebé nia volume bee ne'e boot, liu-liu iha tempu bailoro naruk,” nia dehna,
Iha suku Kribás nian dadaun ne'e sira planeia hela atu dada bee husi suku Orlalan, postu Laklubar nian hodi aumente volume fornesimentu bee ba komunidade sira hodi komunidade hotu bele hetan asesu.(*)