Prezidente Konsellu juventude ne'e dehan, iha postu Lakló eziste grupu rua, ida Juventude Agrikultura Lakló Anan (JALA), ne'ebé haree liu atividade produtivu sira hanesan ortikultura, kuda hahán karau nian ho seluk tan.
Ida seluk maka, Grupu Asosiasaun Hadomi Natureza nia atividade maka haree liu ba atividade protesaun ambientál ninian liuhusi kuda ai-horis hodi proteze rai labele halai iha tempu udan.
“Programa sekretária estadu nian, ha'u koko ho de'it rua iha ne'ebá kona-ba grupu produtivu, liga kedas ho ita nia alin joven sira iha ne'e. Katak, sira sira halo fatin ida ne'ebé kuda multi-sasán, hanesan modo ho buat oioin, sira mós kuda hela ai-oan iha. Presija karau maibé, karau oras ne'e seidauk iha, maibé sira nia atividade ne'e la'o até agora”, Augosto Correia hateten, Kinta (10/12).
Nia hatutan, grupu JALA kompostu husi juventude intelektu’al na’in-rua ne'ebé antes ne’e remata ona sira nia estudu iha universidade, ida ba hala'o estudu komparativu iha nasaun Izrael, maibé la buka servisu iha Dili, sira aplika matenek iha atividade kooperativa tanba servisu hamutuk ba malu.
“Ita hakarak sira nia grupu ne'e koopera fila-fali ho programa sekretaria estadu nian atu bele ba oin, sira bele involve, bele dezenvolve tan iha grupu ne'e. Tanba ida ne'e ami iha grupu rua, ida halai liu ba protesaun ba natureza, ida fali maka grupu produtu ne'ebé ke halo buat oioin, kolam ikan mós iha, kuda ai-oan mós oioin iha ne'ebá, sira mós tama hotu ba iha pekuaria ninian, tanba ai-oan ba karau mós kuda ona, no hein atu hakiak karau”, nia dehan.
Nia lori juventude Lakló tomak nia naran, apresia ho programa SEKoop nian, “sé ami nia grupu ida naran JALA ne'e nia pedidu tama iha sekretaria estadu nia fatin karik, bele aseita ami no koopera ho grupu rua ne'ebé tama iha atividade ne'e”, nia hateten.(*)