Nia hatutan, komandu PNTL munisípiu Manatutu hahú alerta iha loron 22/12, servisu hala’o durante oras 24 to'o loron 28 dezembru, seidauk rejísta kazu asidente no insidente ruma gráve.
"Ami seidauk rejísta, kazu ki'ik-oan, iha asidente ruma monu mesak ida ne’e iha, mais buat ida gráve ne’e to'o agora seidauk akontese. Situasaun hotu-hotu la'o di'ak, dia 24 to'o 25 ami hala'o seguransa ba fatin hotu-hotu, maibé la'o di'ak no hakmatek, laiha asidente, laiha insidente, hotu-hotu la’o ho di'ak", Komandante PNTL Manatutu, Afonso da Costa hateten ba www.tempotimor.com iha nia knaa fatin Nunu-sarau, segunda (28/12).
Nia esplika, durante selebra natál, komunidade iha postu administrativu 6 hanesan Laleia, Lakló, Laklubar, Soibada, Natarbora ho Manatutu Villa, la rezulta asidente ka insidente ne'ebé fatál, maibé situasaun la'o hakmatek to'o ohin loron.
"Laiha, insidente ne'e berati kríme. Kríme ruma ne'ebé insulta malu ka, ataka malu, tuda malu, laiha to'o ohin loron. Hotu-hotu la'o ho di'ak", nia tenik.(*)