Abitante na’in 520 kompostu husi suku lima (5) mak Suku Uma-Kaduak, Lakumesak, Uma-Naruk, Laikore no Uma-Kaduak, Postu Administrativu Laklo no Manatutu Vila ne’ebé sofre dezastre naturál, hafoin udan boot iha loron, domingu (04/04).

Apoiu ai-han báziku hanesan fós saka 30, supermi 30, ikan Sardina kaixa 10, rinso kaixa 5, mina 1 liter kaixa 5, masi midar karon 5 no seluk tan.

Lider Karimátiku, Xanana Gusmão dehan, mezmu ai-han ne’ebé apoiu ho volume ki’ik, maibé jestu solidaridade hanesan Manatutuoan hodi tulun vítima sira ne’ebé hetan susar.

Xanana fó hanoin ba vitima sira katak, dezastre ne’ebé akontese la’ós mosu de’it iha Timor-Leste, maibé povu nasaun viziñu sira iha Kupang-Indonézia mós sofre hanesan ho povu Timor-Leste, tanba ema mate, sasán no uma hetan estragus, inklui animál sira.

“Apoiu ne’e hodi tulun di’ak povu, imi-nia sofrimentu, tanba momentu sira hanesan ne’e ita presiza hatudu ita-nia domin hodi tulun sira ne’ebé sei presiza atu hetan tulun”, dehan Xanana iha nia Rezidénsia Lecidere Dili, tersa (06/04).

Eis lider rezisténsia enkoraza Timoroan hotu atu labele lakon esperansa ba dezastre naturál ne’ebé akontese no husu atu nafatin kolabora malu hodi nune’e bele ultrasa lalais situasaun krusiál ne’e.

Administradór Postu Administrativu Laklo, Samuel Rodrigues Pereira agradese ba apoiu husi Xanana Gusmão ho inteletuál Manatutuoan sira.

"Agradese tebes ba apoiu ida ne’e, tanba oras ne'e dadauk populasaun barak nia uma mós afeta hotu ba inundasaun, inklui natar ho toos sira mota Laklo sobu totál”, dehan nia. (*)