Lamentasaun ne'e agrikultór sira hato'o, relasiona ho udan boot ne'ebé mosu iha loron 04 fulan-abríl ne'e, hodi rezulta korente mota Laklo nian sobu kanu-hasan sira aat totál, inklui natar barak mak hetan estragu.

Agrikultór iha natar La-úta, Justino Mariano de Carvalho dehan, durante mota boot tun, natar ne'ebé sira halai, barak mak mota sobu.

Tanba ne'e, husu ba governu liuliu Ministériu Obras Públikas (MOP) atu buka solusaun lalais liuhusi normaliza fali kanu-hasan hodi sbele hatama bee ba natar.

"Ami-nia problema agora ne'e mak bee laiha, e ami labele hatama bee natar no hare balu ne'ebé dadauk ne'e sei iha, tanba kanu-hasan sira ladi'ak hotu ona. Ida ne'e mak ami husu governu para lori netik mákina eskavator boot ruma mai para hadi’a fali bee dalan ba natar”, dehan agrikultór ne'e, ba www.tempotimor.com liuhusi telefone, kinta (22/04).

Maske, hare balu ne'ebé oras ne'e sei iha hela natar laran, bainhira kolleta, la sufisiente ona atu utiliza ba konsumu, maibé sira prefere rai de'it hodi halo fini ba tinan seluk nian.

Xefe aldeia Uma-surat, António da Costa Oliveira informa, hafoin mota sobu, sira tun direta hodi haree problema kanu-hasan ho natar sira ne'ebé mota sobu, no halo kedan rejista.

"Natar sira mota sobu ne'e, ami foti ona dadus, e liuhusi konsellu suku ami hato'o ona situasaun ne'e ba Munisípiu, ne'ebé agora ita hein de'it desizaun husi leten”, dehan nia.

Tuir dadus, vitima afetadu husi inundasaun iha postu administrativu Laklo, ema hamutuk 225, kompostu husi rai hanehan uma, bee-sa'e, mota sobu natar kuaze ektare rihun 5, toos atus 2, kolam ikan hamutuk 60, bibi-luhan 10, inklui karau hamutuk luhan rua.

Entretantu, postu administrativu Laklo kompostu husi suku 5, aldeia 21, totál populasaun hamutuk 9889 abitante.(*)