Tempotimor (Laklubar) – Sekretáriu Estadu Kooperativas (SEKOOP), Eng. Arsenio Pereira da Silva, M.Agr hala'o sensibilizasaun lala'ok kooperativas nian, ba grupu produsaun bani-been ne'ebé mak iha inisiativa rasik, atu nakfilak an sai kooperativas produsaun bani-been.

 

Sekretáriu Estadu Kooperativas hateten, iha konstituisaun RDTL artigu 138 hatuur ona katak atu hasa'e kresimentu ekonomia iha rai laran, liuhosi pilar tolu mak importante, hanesan; Seitór públiku, privadu, no kooperativas.

 

Tan ne'e, tuir SEKOOP, Governu Dala-Ualu liu hosi Primeiru Ministru Taur Matan Ruak fó prioridade ba seitór kooperativa atu oinsá  bele kria kondisaun di'ak ba povu liuhosi kooperativas para bele hasa'e rendimentu ekonomia uma kain.

 

"Sekretáriu Estadu Kooperativas ne'ebé mak ha'u lidera, sei buka meus oioin hodi optimaliza kooperarivas. Nune'e, bele apoiu ita kooperativas hasa'e kresimentu ekonomia iha rai laran no kontinua mantein polítika SECOOP nian, daudaun ne'e iha,” afirma SEKOOP bainhira diálogu ho produtór sira, iha Suku Funar, Postu Administrativu Laklubar, Munisípiu Manatuto, Tersa (13/08/2019) kalan.

 

 

Nia rasik, sei garante Governu sira seluk mai sei hatutan saida mak SEKOOP atuál halo ona. Tanba programa ida ne'e sei lamate no sei ninia kontinuidade. 

 

Iha tempu hanesan, komunidade Suku Funar, Mateus Soares apresia ba SEKOOP nia vizita iha suku refere. Tuir Mateus, durante Timor ukun an Governu troka malu da-ualu ona, maibé foin SEKOOP mak vizita dahuluk iha suku ne'e, hodi haree direitamente difikuldade no problema ne'ebé durante ne'e povu sira iha suku ne'e infrenta. 

 

"Iha ami nia suku área potensiál liubá produsaun bani-been no ko’a tua. Maibé, difikuldade ne'ebé mak durante ne'e ami hasoru mak ekipamentus ba halo produsaun bani-been no tua nian mak laiha no ami uza nafatin sistema tradisionál," afirma Mateus.