Tanba ne’e informa ba Sekretáriu Estadu Kooperativa (SEKoop), Elizário Ferreira, kona-ba kondisaun moris populasaun sira iha Postu Administrativu nian ba oin, tanba dezastre naturál inundasaun estraga totál sira nia toos ho natar.
Durante fulan rua ba kotuk asume kna'ar nu'udár prezidente autoridade, bainhira halo vizita ba to'o Postu Administrativu Laleia, Laklu, Manatuto Villa, Laklubar, Soibada ho Natarbora. Iha Postu Laklo sai afetadu maka’as iha Munisípiu tomak.
"Ha'u tau kategória mais afetadu ba postu administrativu Laklo?. Ita iha fatin seluk preukupa ho estrada, ita iha fatin seluk, preukupa iha ponte, ita iha fatin seluk preukupa ho bee, ita iha fatin seluk preukupa ho ahi. Komunidade Laklo nia preukupasaun sai oin seluk liu. Buat ne'ebé Maromak tau ba sira Laklo, hahú husi sira-nia Beiala to'o mai ohin, lakon hotu kedas, e lahatene sira atu moris ba oin ne'e, moris oinsá, só Maromak de'it mak bele hatene", hatete Bernardo Lopes, iha Salaun Administrasaun Munisípiu, kinta (16/09).
Ba problema inundasaun ne'e, Governu bele halo esforsu hothotu hodi fó apoiu ba populasaun sira, maibé Governu difísil atu fábrika fali rai hodi distribui ba komunidade sira.
"Governu bele halo buat hotu, Governu bele halo ponte estrada, bee, maibé laiha Governu ida iha mundu ne'e, atu fábrika rai, fahe ba nia povu. Buat ne'ebé akontese iha Laklo", dehan nia..
Tuir dadus, inundasaun iha loron 04 Abril 2021 ne'e, estraga komunidade Laklu nian natar kuaze ektare rihun-5, toos hamutuk 50, inklui komunidade na'in-7 lakon vida (mate), tanba mota lori, maibé na'in 6 seluk to'o oras ne'e seidauk hetan sira-nia isin mate.
Postu Administrativu Laklu, husi Suku Hohorai, Uma-naruk, Laku-mesak, Uma-kaduak, Laikore, aldeia hamutuk 31, ho totál família Uma-kain iha 2.196, mane 4.847, no feto 4.683. (*)