"Anin-boot ne'e akontese iha tuku tolu ona, hodi sobu ha'u-nia komunidade sira-nia uma, hanesan kalén sira nakloke hotu, no iha uma tali ida mak anin-boot hodi sobu totál”, informa Xefe Aldeia Fatukonan, Luciano Makarun Cárceres, ba www.tempotimor.com iha nia rezidénsia, kinta (23/09).

Maske nune'e, durante insidente anin-boot ne'e mosu hodi sobu no estraha sira-nia uma hanesan kalén no uma nia kakuluk, maibé la estraga sasán uma-laran.

"Iha uma ida nian, kalén ho tahan hamutuk 24 husi kuartu rua nian mak anin halo estraga totál, tanba anin sobu sai hotu", haktenik nia.

Tanba ne'e, husu ba Governu, liuhusi Ministériu Solidariedade Sosiál no Inkluzaun (MSSI) iha nível munisípiu no postu atu tun direta ba terrenu hodi observa kondisaun real, nune'e bele fó apoia ruma ba família vítima sira.

"Ami husu de’it ba parte sosiál atu mai haree rasik situasaun iha ami-nia aldeia, e ami husu atu fó mós ajuda ruma ba ami hanesan kalén ho ai-hán ruma", dehan nia.

Xefe família vítima sira ne'ebé nia uma hetan estragu husi anin-boot mak hanesan, Adolfu Cárceres, Valente da Silva Guterres Cárceres, inklui Xefe Aldeia Fatukonan rasik. (*)