Tuir Xefi suku Daisua, Amorin Sarmento da Costa katak, suku Daisua hamutuk aldeia lima hanesan, Daisua, Resulau, Riatú, Lesuwai ho Loti, maibé kuantidade populasaun husi aldeia lima ne'e, no pursentu 25% hela iha villa no pursentu 75% hela iha área rurál no sira infrenta liu problema kona-ba la asesu eletrisidade.

"Komunidade ne'ebé hela iha área rurais ne'ebá ne'e, sira nia ezíjensia maka dezenvolvimentu kona-ba eletrisidade, bee-mos no estrada, tanba infraestrutura bázika sira ne'e mak populasaun seidauk asesu," dehan Amorin ba www.tempotimor.com iha administrasaun munisípiu Manufahi, Kinta (11/2).

Nia hatutan, problema eletrisidade ba komukidade sira ne'e, mosu dezde tempu okupasaun Indonézia to'o mai ohin loron.

Iha fatin hanesan xefi aldeia Daisua hatutan, komunidade barak to'o oras ne'e seidauk asesu ba eletrisidade, maske komunidade balun hela iha área urbana.

"Ha'u nia komunidade barak liu mak hela iha foho, sira ne'e dook husi villa i too agora sira mós la asesu hotu ba eletrisidade," dehan nia.

Liga ba preokupasaun sira ne'e, iha tempu balu ba kotuk, autoriedade lokál hamutuk ho Organizasaun la'ós governu HAK aprezenta ona pedidu ba diretór jerál Eletrisidade Timor-Leste (EDTL) nian iha nasionál, maibé sira dehan governu seidauk planu loke tenderizasaun, tanba orsamentu laiha.

"Maibé, sé imi hakarak atu komunidade bele asesu ba naroman eletrisidade, kompañia ka komunidade sira bele hasai osan rasik hodi dada liña eletrisidade iha aldeia laran," hatete nia.(*)