Iha vizita ne'e, reprezentante kooperativa kréditu HJF, Armando Bento de Jesus informa, konstrusaun ba sede ne'e, durante paradu tinan ida fulan 6 tanba kauza husi inundasaun iha loron 04 fulan-abril liuba, hodi rezulta korente mota tun, nune'e difikulta sira labele tula rai henek ho fatuk ultrapassa ba Suku Tutuluru.
Kooperativa HJF ne'e, hari’i iha loron 30 fulan-marsu 2012 to'o agora rejista ona membru hamutuk ema na'in-40.
“Fundus ne'ebé ami tau iha relatóriu ne'ebé mak iha fulan 6 ba kotuk ne'e, ami-nia fundus ne'e iha US$19 mill itál. Ho totál ami-nia membru 44 pesoál e to'o agora membru nee na’in-4 sai tiha, sei hela ami 40 pesoál sei eziste hela iha fatin ida ne'e”, dehan Armando.
Kritériu atu sai membru iha kooperativa ne'e mak, tenke hetan formasaun, hafoin halo implementa fali kuñesimentu iha kooperativa, maibé presiza kontribui osan ho montante hamutuk U$S40.
"Kritéria atu sai membru ne'e maka ema individu ne'e tenke hakbesik mai ami nia kooperativa ne'e dala-tolu ba leten, e nia isin na'in rasik hakarak atu mai sai membru, depois ida ne'e maka ami bele rejísta nia hanesan membru ho montante osan ne'ebé tama ne'e, ho 40 dollár. Ida ne'e 10 dollár sai hanesan osan ba administrasaun ninian US$25, osan obrigatóriu ho dollar US$5. Ida ne'e de'it mak kritéria atu sai membru iha kooperativa HJF”, esplika nia. (*)