Print this page

Komunidade Alas Preparadu Hari’i Kooperativa Multisetorial

By August 01, 2021 3875
Prezidente Kréditu Uniaun Asosiasaun Alas, Leopoldo Barreto dada lia hela ho SEKoop Elizário Ferreira kona-ba futuru kooperativa nian iha Alas, Manufahi. Prezidente Kréditu Uniaun Asosiasaun Alas, Leopoldo Barreto dada lia hela ho SEKoop Elizário Ferreira kona-ba futuru kooperativa nian iha Alas, Manufahi. Foto Tempo Timor

Tempotimor (Manufahi)-Komunidade produtór sira prepara-an ona atu hari’i kooperativa multisetorial iha Postu Administrativu Alas, Munisípiu Manufahi.

Planu hari’i kooperativa multisetoriál ne'e, tanba iha Postu Administrativu Alas, eziste rai ne'ebé iha poténsial ba produsaun hodi halo atividade Ortikultura, Peska ho kréditu.

"Ami lubuk ida ne'e hamutuk hanoin, planeia hela depois hetan posse, no fiar husi sua-exelénsia, ami-nia planu atividade ba oin, ami tau hela, iha primeiru rai no empresta osan ba membru depois iha mós atividade seluk kona-ba atividade Ortikultura no seluk mak atividade pekuária no peska”, dehan Vise Prezidente Kréditu Uniaun Assosiasaun Alas, Leopoldo Barreto, durante simu vizita husi SEKoop, Elizário Ferreira, iha Alas, Manufahi, sesta (30/07).

Husi atividade tolu hanesan kréditu, pekuária, ortikultura no peska, durante ne'e membru sira hala'o hela ho grupu ne'ebé ki'ik, maibé atu nakfilak ba kooperativa mak seidauk.

"Iha grupu pekuária no peska, durante ne'e la'o, mais difikuldade maka sé ita-nia peskadór sira, grupu ne’e tun ba, ikan bele barak, maibé dada tenke sukat. Sé ita hasa'e hotu mai, entaun hakarak ka lakohi kompradór tenke iha, laiha ita estrava ika. Tanba fatin laiha atu asegura ikan ba semana ida rua. Ida ne'e mak difikuldade ne'ebé peska hasoru”, hatete nia.

Kona-ba pekuáriu nian, durante ne'e grupu sira la'o nafatin, maibé problema mak hahán atu fó hán ba animál sira mak laiha, nune'e mós iha ortikultura seidauk iha matérial servisu ida di'ak, hodi ajuda agrikultór sira halo to'os, fila rai, kuda modo no ai-hán seluk tan.

"Difikuldade mak, rai no empresta osan. Agora, ami iha grupu ki'ik ne'ebé mak ajénsia mai hatudu la'o hela, maibé kuandu ami forma grupu ba nível postu, ami sei preukupa mak fatin. Ami hanoin fatin oinsá mak atu bele seguru ba ami”, informa nia.

Sekretáriu Estadu Kooperativa (SEKoop), Elizário Ferreira esplika, buat ida asosiasaun, ema bolu dehan karitativa, kréditu uniaun nia karáter sosiál, maibé nia hala'o atividade ekonómiku.

"Termu rua ne'e depende ba malu, maibé karáter ne'e lahanesan. Ida fó de'it, mais kréditu uniuan ne'e la eduka ema atu independente, la depende ba ema seluk. Iha kréditu uniaun, iha pekadu hitu, ida primeiru maka, dependente ba instituisaun exterior. Kuandu ita depende demais ba instituisaun exterior, ema fó apoiu ita, ita sei la dura, sei mate”, dehan Elizário, durante vizita grupu produtór sira iha Postu Administrativu Alas, Manufahi.

Aleinde ne'e, preukupasaun kona-ba laiha edifísiu, governante ne'e hatán, governu liuhusi SEKoop, sei responde, maibé xáve importante maka dirijente no membru sira tenke iha komitmentu hodi servisu no dezenvolve kooperativa ba oin, tanba SEKoop la husik grupu kooperativa atu la'o mesak, maibé buka tulun nafatin liuhusi edukasaun no formasaun.

Entretantu, Kréditu Uniaun Asosiasaun Alas, hari'i husi membru na'in-11, maibé ema iha nia grupu komunitáriu rasik ne'ebé eziste kleur ona iha Alas, hamutuk 60 resin, barak liu mak rai no empresta osan. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items