Print this page

Garante Sistema Autoridade Marítima Presiza Ideia Liña Ministeriál

By October 17, 2019 2731
Ministru Defeza no Seguransa (MDS), Filomeno da Paixão de Jesus. Ministru Defeza no Seguransa (MDS), Filomeno da Paixão de Jesus. tempotimor.com

Tempotimor (Dili) – Ministru Defeza no Seguransa (MDS), Filomeno da Paixão de Jesus hatete, atu garante ba sistema Autoridade Marítima nian, presiza ideia husi liña ministeriál seluk, hodi bele hala'o kontrola iha tasi ho di'ak.

 

Nia dehan, Autoridade Marítima Nasionál (AMN) ne'e transversál. Entaun, presiza reuniaun ho ministeriu ne'ebé relevantes, komesa husi Finansas, Alfandega, Polísia, F-FDTL, Ministériu Defeza i Seguransa, Ministeriu Saúde, Ministeriu Transporte i Telekomunikasaun no seluk tan.

 

"Presiza tuur hamutuk para bele deskute hotu, para bele haree sistema ida ne'ebé di'ak, atu bele lori seguransa di'ak liu ba estadu. Tantu iha tasi laran no portu sira hotu para prinsipál lori buat hirak ne'e ba efikas," dehan MDS, Filomeno Paixão iha edifisiu Ministériu Solidariedade Sosiál no Inkluzaun (MSSI), Kaikoli, Kinta (17/10/19).

Ministru ne'e afirma, opsoens tolu ne'ebé atu deskute mak; Ida, Polísia Marítima ne'e tama fali ba komunidade militár nian. Rua, Polísia Marítima tama fali iha PNTL. Tolu, Polísia Marítima sai husi F-FDTL, tama fali iha Autoridade Maritima.

 

Nia hatutan, sistema Autoridade Maritima ne'e hakarak Komodor ida husi tasi mak komandu. Nune'e, nia bele maneja ou jere ema sira ne'ebé mai husi ministeriu sira seluk, para bele hetan informasaun kona-ba tasi nian, i isin moris para bele haree ba ameasa ka diskriminasaun ruma iha tasi laran.

 

"Durante ne'e, ita haree seguransa iha tasi laiha. Em vez entrega ba F-FDTL no PNTL ka entrega ba Autoridade Marítima. Tanba, Autoridade Maritima ne'e kaer Komponente Naval no Maritima," informa MDS ne'e.

 

Nia dehan forsa rua ne'e la'o hamutuk ho ró-ahi sai plataforma ida dei't bele ba kontrola iha tasi, i la'ós dei't iha tasi besik territorial, maibé, iha mós zona kosteru no ba ekonomia esklusivu.

 

Kona-ba portu, nia subliña, iha portu sei iha kapitaun portu no kapitaun ne'e sei koloka iha portu entrada iha Dili, Oe-cuse no seluk tan ne'ebé presiza.

 

"Tanba ne'e, presiza liña ministeriál sira tuur hamutuk para bele ema sira koloka iha ne'ebá, ne'e bele kontrola ró-ahi  no sasán sira ne'ebé tama mai. Nune'e,  ita garante ba servisu Autoridade Maritima nian efikas, efisiente no metin liu. Ida ne'e mak ita nia hakarak," tenik Paixão.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items