Dezenvolve Agrikultor/tura Timor-Leste hodi sai husi prinsipiu Safety first ba Market Orientation Featured

By Quintiliano Belo June 10, 2018 5239

 

Hosi: Quintiliano Belo  

“Maneira Elimina Agrikultor nia Pensamentu

Husi Risk Minimization ba Profit Maximization” 

Dezenvolvimentu setór agrikultura iha Timor-Leste realmente lao bei-beik maibe neneik. Ne’e akontese tanba iha prosesu elaborasaun planeamentu la hare problemas baziku rua importante maka hanesan; Premeiru, mayoria agrikultor ne’ebe eziste iha Timor-Leste hanaran Peasant laos Farmer. Hanesan sosiologo ida naran James Scott,1985 hateten;

  • Peasantsignifika katak, agrikultor  sira ne’ebe uza hela prinsípiu risk minimization no safety first (kapasidade produsaun kiik, subsistensia, la iha rai ne’ebé luan, la iha orientasaun ba merkadu no  produs la’os buka rendimentu ekonómiku). Simplesmente dehan, kuda para bele han iha aban.

 

  • FarmerSiginifika katak, agrikultor sira ne’ebe utiliza prinsípiu profit maximization no market orientation (kapasidade produsaun bo’ot, modernu, iha rai ne’ebé luan no produz ho orientasaun merkadu hodi hetan rendimentu ekonómiku). Simplesmente ‘kuda ohin para hetan lukru’

Segundu, vontade politika atu dezenvolve dezenvolvimentu agrikultura integradu ladauk maximu tamba dezenvolvimentu seitor agrikultura dominadu ho ego setóral no la partisipativu. Laiha ajustamentu bazeadu ba limitasaun sira hanesan; menuz infrastrutura bazika agrikolas, agrikultor laiha asesu ne’ebe diak ba sistema kreditu iha banku, menus asesu ba teknolojia liu-liu mekanika moderna hodi hasae produsaun agrikolas, kuantidade produsaun la stavel tanba laiha posibilidade atu utiliza rai abandonadu ne’ebe partensia ba governu no korenti agronegosiu agrikultura mate tanba Timor-Leste obsekadu ho neoliberalizmu merkadu, nune’e bainhira implementa politika dezenvolvimentu setór agrikulas la bazea ba metas no visaun ne’ebe definidu iha PEDN.

Hare ba problema baziku rua iha leten, hakarak ka lakoi involvimentu direta agrikultór iha dezenvolvimentu seitor agrikultura  importante tebes. Dezenvolvimentu tenki bazia ba ba  needsresourcesskills no  management iha prosesu tomak dezenvolvimentu seitor agrikultura. Hanesan argumentu balun hateten prosesu transformasaun setór agrikultura ne’ebé ita hotu mehi tuir visaun PEDN 2030 sei labele akontense kuandu agrikultor sai fali objeitu no la partisipativu. Pior liu tan kolonializmu foun hanesan era globalizasaun, liberalizasaun, no privatizasaun invade maka’as ita nia rain Timor-Leste.

Ne’e akontense tamba vontade politika atu halo mudansa iha seitor ne’e laduak seriu no politiku sira interese liu ba naran boot duke resultadu servisu. Alende ida ne’e odomatan portu nian ne’ebe nakloke demaziadu ba importador sira husi rai seluk liu-liu produtus agrikulas sira, ate pescador sira mos konsumu fali ikan zeladu ne’ebe mai husi singapora.  La iha seriedade hodi hamenus importasaun produsaun agrikulas husi rai liur maske hatene hela katak, produtu refere agrikultor husi Maubessi, Bobonaro no Manatutu, Baucau, Ermera mos bele produz, la interese atu expire ka la expire no la interese produtu refere sortir ka la sortir. (Exp, fos ne’ebe tama mai Timor-Leste fos klasse terseiru katak fahi mos bele konsume, no hanasen mos Ayam Potong kualidade att liu tuir Brazil nia standarte.

Atu fo resposta ba lalaok sira iha leten nia dalan simples no fasil tebes, naran katak, hahu agora! politiku sira iha pesanmentu ida deit hanesan; premeiru eradika, top down development approach. Para ona utiliza agrikultor nudar objeitu tanba iha tinan hirak ikus ne’e desemovlimentu iha Timor Leste, hatudu momos katak, resultadu ekonomikamente diak tebes maibe, sosialmente laiha mudansa ne’ebe signifikativu. Pior liu tan grafiku dezenvolvimentu setór agrikultura iha tendensia tun ba beik-beik, kuandu hare husi resultadu produsaun no area koilheta iha kada tinan, att liu tan are are irigadu kuase 32000 ha ladauk utiliza ho mazimu menus husi metade.

Sengundu, Minimiza neoliberalizmu ba merkadu. Prontu minimiza neoliberalismu ba merkadu hodi fo oportunidade ba agrikultor sira atu haforza-an liu husi dalan promove subsetór agronegosiu integradu liu husi habelar asesu sira ba kreditu, subsidiu mekanika agrikula bazea ba prinsipius competiveness, grass root economic no sustainability nune’e lalais ka kleur agrikultor sira bele sai husi safety first ba market orientation, hanesan tuir mai ne’e:

  • Premeiru,Dezenvolve Up-stream agribusiness hanesan; industrializasaun ba kriasaun kapital agrikultura nian, industrializasaun fini no viveirus, industrializasaun animal, industrializasaun ikan, industrializasaun agrokimia (adubus, aimoruk, vasinasaun animal no hakiak ikan), no industrializasaun equipamentu agrikula (agro-automotive) liu husi public private partnership (PPP).

 

  • Segundu,Dezenvolve On-farm agribusiness katak kriasaun atividades kulturas komuditi agrikula primadona hanesan negosiu produsaun alimentar, hortikultura, aihoris ba aimoruk sira, plantas industriais, pecuaria, pescas no rekursus florestais.

 

  • Terseiru,Dezenvolve Down stream agribusiness katak kriasaun aihan fresku animal nian no kriasaun ransu animal nian lokalmente, no produsaun bio-enerjetika hodi sai hanesan enerjia alternative ba agrikultor iha area rural.

 

  • Kuartu,Dezenvolve Services for agribusiness katak kriasaun koperativa kreditu, transporte no armazenamentu, sentru prosesamentu sira, moderniza sentru tratores ezistenti, revitalizasaun centru pesquisa no establesementu estatistika informasaun geografica agrikultura hodi garante planu e politika desemvolvimetu setór agrikultura nasional bazeandu ba rekomendasaun no resultadu pesquisa no dadus rekolhadu.

Atu suporta sistema agronegosiu integradu tuir esplikasaun iha leten, esperiensia sira tuir mai nudar referensia diak ba Timor-Leste atu banati tuir bazea ba estudu ne’ebe halo husi Prowse no Chimhowu (2007) ho nia titlu “Making Agriculture Work for The Poor” iha pilar tolu ne’ebe importatnte ba strategia dezenvolvimentu setór Agrikultura nian hanesan:

  1. Habelar no hadiak dezemvolve infrastrutura hodi suporta ekonomia lokal.Infrastrutura bazika nudar fator savi ba agrikultor sira ne’ebe hela iha area rural. Iha Vietnam, numeru mukit tun maka’as depois tiha sira halo investimentu infrastrura ba irigasaun no estrada rural kuase pursentu 60 husi orsamentu de estadu ne’ebe alokadu ba setór agrikultura iha dekade 1990 nia laran. Lalaok ne’ebe hanesan halo mos iha india, nune’e mos iha etopia ne’ebe konsege infrenta situasaun krizi aihan iha mediu dekade 1980, sira haka’as hadia no konstrui estrada rural sira no aumenta asesu ba merkadu nune’e agrikultor sira rasik hi’it rasik hodi hadia sira nia moris. Timor-Leste konsege ona buat balun, hanesan eletrisidade, be mos, estrada rural, no irigasaun skala kiik sira maske ladauk maximu no sei dauk kobre teritoriu tomak.
  2. Habelar no hadiak asesu ba edukasaun. Papel edukasaun nian iha relasaun mutua ho 1)Hasae produsaun agrikula, kapasita Timor oan hodi asesu ba eskola vokasional 2)Kria opsaun invenstimentu seitor pribadu no diversifika atividade agronegosiu no 3)Minimiza numeru migrasaun husi rural ba urbana. Kasu Timor-Leste, ministeriu edukasaun esforzu maka’as los maibe, iha realidade hatudu momos katak modelu edukasaun Timor-Leste nian domina ho ensino jeral no ikus mai produz rekursu sira la ho badaen ne’ebe sufisienti, nune’e kria fali numeru migrasaun no numeru dezempregu ou piada karik husik foho mai Dili tanba moe atu halo servisu nudar agrikultor.
  3. Habelar no hadiak asesu ba redi informasaun. Kriasaun redi informasaun sufisiente no bebeik nudar fonte prinsipais ba dezenvolve kuñesementu no badaen agrikultor sira. Informasaun refere tenki unifika no harmoniza ho esistensia kunesementu lokal ka local wisdom. Exemplu informasaun kona ba teknolojia foun ne’ebe iha realsaun ho agrikultura ne’ebe dezaminadu la kontrariu ho local wisdom. Lalaok ne’e implementa ona iha Timor-Leste, maibe politiku sira la iha seriedade atu rekuinese no harmoniza konseitu kona ba importasia redi imformasaun liu husi estensaun. Kestiona fali existenti konseitu estensaun nian hodi estesionista sira mak sai fali vitima. Konseitu husi Australia, Europeia ka Afrika konserteza sei lahanesan ho konseitu ne’ebe Timor-Leste rasik mak dezenvolve.

Nune’e hau rekomenda hodi define lolos agrikultor laos ona objeitu maibe sujeitu ba dezenvolvimentu, minimalizasaun invasaun neoliberalizmu merkadu, eradikasaun pratika top down approach iha implementasau politika dezenvolvimentu agrikultura, promove pratika dezenvolvimentu partisipatoria iha implementasaun politika dezenvolvimentu agrikultura. Aumenta no optimaliza area kultivu agrikultor nian liu husi utulizasaun rai potensial ne’ebe abandonado, kria redi agronegosiu bazea ba potensia suco ida-idak nian, reforza sistema pesquisa no desiminsaun teknologia agrikultura adekuadu iha area rural liu husi revitalizasaun redi estensaun agrikola, promove investimentu public private partnership hodi halo industrializasaun area agro auto-motive no ikus liu promove investimentu seitor pribadu ba setóres agrikultura, pecuaria, pescas no floresta.

 

Rate this item
(1 Vote)
Last modified on Sunday, 10 June 2018 22:56

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com