To'o ohin loron, tuir informasaun ne'ebé tempotimor.com asesu husi pajina facebook ministériu saúde, Palácio das Cinzas, to'o iha 28 Marsu Timor-oan na'in 851 mak sei iha periodu kuarentena. Husi númeru ne'e, na'in 283 mak tama kuarantena ne'ebé governu prepara no na'in 568 kuarentena iha idaidak nia uma.

Tuir dadus MS ne'e, sira ne'ebé hala'o kuarentena iha uma no pasa ona loron 14 hamutuk na'in 207 no na'in 361 sei iha akompañamentu nia laran.

Ba sira ne'ebé kuarentena iha fasilidade governu nian, seidauk iha ema na'in ida mak pasa periodu kuarentena.

Tuir tabela ne'ebé MS públika, iha kuarentena A iha na'in 71, kuarentena B na'in 100, kuarentena C na'in 27, kuarentena D na'in 25, kuarentena E na'in 38, no kuarentena F na'in 22.

Maske nune'e, iha dadus diferente ne'ebé tempotimor.com asesu husi autoridade seguransa ne'ebé simu Timor-oan iha Aeroportu katak daudaun ne'e iha Timor-oan na'in 289 mak hela iha kuarentena ne'ebé governu prepara.

"Total ema ne'ebé dadaun ne'e kuarentena iha Hotel Novu Horizonte Metiaut na'in 139, Luxury Hotel iha Hudi-laran na'in 28, INAP iha Komoro na'in 30, Hotel Audian na'in 70, no iha Fantazia Hotel iha Pantai Kelapa na'in 22," dehan autoriedade seguransa ne'e, Sabadu (28/03/2020).

Tuir fonte ne'e, ho prezensa Timor-oan na'in 59 husi Australia, signifika katak númeru iha fatin kuarentena sei sa'e.