MINISTEIRO DA REFORMA LEGISLATIVA E DOS ASSUNTOS PARLAMENTARES Featured

Andre Lotte, Xefe Gabinete MRLAP Andre Lotte, Xefe Gabinete MRLAP Foto MRLAP

Tempo Timor publika iha loron 4 fulan-Juñu 2019 notísia ida ho títulu Fidelis Husu Deputadu Sira Labele “Asal Bunyi”. Títulu ida ne’e la los no konteúdu husi notísia ne’e rasik la han-malu ho ninian títulu.

Iha loron Segunda liubá hafoin sesaun plenária Parlamentu Nasional nian, Ministru Reforma Lejizlativa no Asuntus Parlamentares, Fidelis Leite Magalhães informa ba jornalista sira kona-ba pergunta ne’ebé senhora deputada ida husu relasiona ho relatóriu ezekusaun orsamentu estadu nian ba trimestre dahuluk ne’ebé governu fo tiha ona ba Parlamentu Nasional. Ministru mós hatutan katak senhor Presidente Parlamentu Nasional haruka fahe tiha ona relatóriu refere. Tanba ida ne’e maka importante tebes atu le’e uluk relatóriu nebe hato’o ona husi Governu molok Deputadu sira halo intervensaun makas iha plenaria.

Ministru nunka dehan deputadu sira labele “asal bunyi” no nunka koalia sai liafuan “asal bunyi” ne’e rasik, tanba ladiak atu hasai liafuan hanesan ne’e hodi diriji ba ema seluk. Nudár konsekuensia, títulu ne’ebé Tempo Timor hili infelizmente reprezenta falta de respeitu ba leitor sira tanba manipula ema no halo ema fiar katak Ministru koalia duni liafuan sira ne’ebé Ministru nunka dehan.

Iha loron hanesan mós Tempo Timor publika notísia seluk ho títulu Fidelis Promete Governu Sei Proteje Sidadaun Hatama Droga ba Indonésia. Títulu no liafuan hirak ne’e sai hanesan preokupasaun bot ba manipulasaun informasaun ne’ebé kontribui ba Fake News. Ida lo’os maka, Ministru afirma katak governu iha dever atu proteje direitu sidadaun timor oan nian hodi hetan asesu ba justisa – ne’e signifika mós proteje direitu sidadaun nian ba julgamentu ida ne’ebé justu.

Hanesan Ministru dehan fila-fila, “liberdade de imprensa ne’e buat ne’ebé valiozu tebes, tanba ne’e maka jornalista sira mos iha dever atu hato’o notísia ne’ebe klaru ho kualidade diak hodi bele hetan respeitu husi públiku. Pelu kontráriu, falta de rigor, ka at liu, violasaun ba étika profisionál maka sei loke dalan hodi hakanek liberdade de imprensa ne’e rasik”. Nune’e, títulu ba notísia tenki refleta duni liafuan sira ne’ebé hakerek momos iha informasaun ne’e rasik : la’os atu uja títulu hodi intensionalmente halo atake ba ema karuk ka los, no hamosu konfuzaun, mezmu hasoru sidadaun komun ka hasoru governu. Foin lalais ne’e, Ministru mos dehan nia “fiar katak Tempo Timor bele sai jornal ida ho kualidade as iha futuru, no sei hetan konfiansa husi públiku. Maibe presija evita hahalok sensasionalista. Presija deit maka hakerek diak no kontinua halo investigasaun ne’ebé klean wainhira prepara notísia ida.

Ho respeitu ba direitu sidadaun sira atu hetan informasaun ida ne’e ho lia-los, inklui mós respeitu ba leitor Tempo Timor sira, maka hau husu ba Sr. Diretór atu publika klarifikasaun ida ne’e ho destake iha pájina oin website Tempo Timor nian ho divulgasaun máximu hanesan notísia sira ne’ebe publika antes.


 

Rate this item
(0 votes)
Last modified on Wednesday, 05 June 2019 20:38
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.