Tuir informasaun ne’ebé www.tempotimor.com asesu iha loron segunda (13/09) katak, alterasaun dahuluk ba Dekretu-Lei ne'e hala'o ba kompozisaun orgaun sira no rekizitu ne'ebé kesi Instituto para a Qualidade de Timor-Leste, I.P. (IQTL), aumenta númeru membru no konkretiza kompeténsias ne'ebé pertense ba orgaun sira IQTL ninian.
"Prezidente Repúblika, Francisco Guterres Lú Olo, promulga alterasaun dahuluk ba Dekretu-Lei kona-ba Estatutu Instituto para a Qualidade de Timor-Leste, I.P. (IQTL)", dehan Xefe Casa Sivil Prezidente Republika, Francisco de Maria Vasconselhos liuhusikomunikadu, segunda (13/09).
Hala'o mós harmonizasaun ekiparasaun ba kategória titular kargu sira iha orgaun sira IQTL nian. Kláuzula Estatutu IQTL ne'ebé sai parte integrante husi Dekretu-Lei ne'ebé kria institutu ne'e mós sai sujeitu ba alterasaun.
Entre artigu sira ne'ebé hetan alterasaun mak artigu 3 ne'ebé dehan IQTL bele hala'o servisu territorialmente deskonsentradu nune'e Ministru Turizmu, Komérsiu no Indústria mak sei tutela no iha kompeténsia nomea no ezonera Konsellu Administrasaun no Konsellu Fiskal IQTL, I.P (iha kazu nomeasaun no ezonerasaun Konsellu Fiskal, Ministru Finansas mak tenke propoin).
Konsellu Administrasaun kompostu husi prezidente ida, sekretáriu ida no vogál na’in-3, nomeadu husi Ministru ne'ebé tutela. Antes ne’e, Konsellu Administrasaun kompostu husi prezidente no vogál na'in-2, nomeadu husi Konsellu Ministru, bazeadu ba proposta husi Ministru tutela. (*)