PM Taur dehan, nia parte preokupa mós ho problema membru governu ne'ebé seidauk kompletu tanba afeita mós ba serbisu governu nian.

"Naturalmente ha'u hanesan Primeiru Ministru ha'u preokupa, hanesan ekipa ne'ebé ba joga bola maibé ekipa la kompleitu ne'e susar," dehan xefe governu ne'e iha Palásiu prezidensiál Bairro-pite, Kinta (26/09).

PM Taur husu ba parte hotu atu pasiénsia hein solusaun tanba nu'udar Xefe Governu nia mós pasiénsia barak ona.

"Husu ba sira pasiénsia, se ha'u mós bele pasiénsia tanba saida mak sira nervozu uluk iha li'ur ne'ebá. Klaru ke preokupasaun ida ne'e ha'u sempre levanta ba eselénsia Prezidente Repúblika par haree saida mak ita halo tán," dehan TMR.

"... Povu nafatin konfia ba ami, tanba buat ne'ebé ba nasaun nia di'ak ami sei halo, la'os tanba membru governu na'in sia ne'ebé seidauk iha," nia afirma.

Molok ne'e, deputada Khunto Olinda Guterres deklara iha plenária PN katak, Khunto prontu ona troka kandidatu membru governu pendente.

Enkuantu, deputadu husi Bankada CNRT no PLP firme iha pozisaun hodi mantein lista ne'ebé molok ne'e hato'o ona ba PR Lu Olo.

Razaun husi deputadu na'in rua ne'e tanba desizaun atu troka ka mantein kandidatu membru governu pendente iha Konsellu Diretiva AMP nia liman.