"Lei KAK ne'e, Komisaun A deskute to'o ona iha artigu 20 husi kapítulu ida. Tanba, ita iha kapítulu 5 no ita iha artigu 140 resin. Ida ne'e hatudu katak sei lori tempu. Agora ita tenke iha referénsia ba deklarasaun de bens nian," dehan Vise Prezidente Komisaun A ne'e iha PN, Kuarta (02/10/19).
Nia afirma, referénsia ne'ebé laiha halo Komisaun A ba halo estudu komparativu iha Macau. Maibé, referénsia ida ne'ebé di'ak liu mak iha Argentina, kona-ba deklarasaun de bens ne'e.
"Ita ba halo estudu komparativu iha Macau, tanba iha ne'ebá mós estabelese hela kona-ba deklarasaun riku-soin, no ita la tau de'it artigu ba artigu, mak ita hatene katak korrupsaun ne'e mak ema ne'ebé riku derepente de'it ne'e. Tenke aplika para nia deklara," dehan Vasconcelhos.
Nia afirma, tanba relatóriu husi estudu komparativu ne'e iha segunda semana ne'e signifika sei buka tempu hodi kontinua deskute, maibé bele kontinua iha Novembru laran. Tanba, fulan ne'e Orsamentu Jerál Estadu (OJE) tama ona iha Parlamentu Nasionál.
"Diskusaun tarde ne'e la prejudika servisu KAK nian, tanba lei estabelesimentu KAK nian iha ona, no lei ida ne'e atu fó tan kbiit ba KAK," afirma Vasconcelhos.