Hanesan tempotimor.com públika ona katak, deskonfia mosu kazu halakon osan estadu ne’ebé komete husi diplomata balun ne’ebé reprezenta Timor-Leste, hodi ba serbisu iha rai li’ur.
Kazu ida akontese iha Koreia du Sul ne’ebé komete husi eis Sekretaria Daruak Embaixadór Hernani Coelho ho inisial EdS.
EdS komete kazu halakon osan estadu hamutuk KWD 50,000,000 ka USD $49,504,95. Osan ne’e atu selu edifísiu Embaixada TL iha Koreia du Sul.
Notisia relevante: Deskonfia MNEK Hak’iak Na’ok-teen
Kazu seluk mak kazu ne’ebé akontese iha Konsuladu TL iha Sidney, Austrália, ne’ebé komete husi diplomata TL ida ho inisial SMS.
Deskonfia diplomata ne'e, transfere osan estadu hamutuk $86.000 ba nia konta bankaria privadu. Osan ne'e Governu, liu husi MNEK, transfere ba konta bankaria konsuladu nian hodi uza ba atividade konsuladu nian iha Sidney.
Notisia relevante: Deskonfia Diplomata Naok Osan, Tusan Bobar Konsuladu TL
Ba kazu hirak ne’e, MRLAP Fidelis husu ba Komisaun Anti Korrupsaun (KAK) atu hahú loke prosesu investigasaun.
"Se iha provas ba ema sira ne'ebé komete krime, iha KAK, iha Prokuradoria hala'o ninia serbisu.
Agora, pozisaun Governu nian mak hanoin kona-ba kombate korrupsaun. Maibé, kuandu komete ona iha krime ne'e KAK no Ministériu Públiku nia serbisu,” dehan Ministru Fidelis iha Parlamentu Nasionál, Tersa (15/10/2019).
Nia afirma, atu kombate korrupsaun ne’e nu’udar knaar KAK no MP. Maibé, importante mak tenke tau nafatin prejusaun inosénsia iha oin.
"Polítika ida mak knaar KAK nian atu halo investigasaun no mós knaar MP nian. Agora buat ida ne'ebé ita labele halo mak ita labele duun ema. Tanba iha prinsípiu ida dehan prejusaun inosénsia katak nia inosente, bainhira tribunál deside katak nia sala mak foin sala," dehan Fidelis.