Molok ne’e, bainhira kazu rai iha Kaitehu mosu hafoin Xanana sobu lutu ne’ebé kompaña balun harii, MJ Carcerese mosu ho promesa atu sobu mafia justisa.
Maibé, to’o ohin loron promesa ne’e seidauk konsege realiza.
Ba kestaun ne’e, Deputadu CNRT Jorge Virgilio husu atu MJ Carcerese sobu ona mafia bazeia ba promesa ne’ebé nia halo ona.
"Ha'u hakarak husu Ministru Justisa (MJ) Manuel Cárceres da Costa rasik, bainhira mak atu fakar sai (bonkar) mafiozu sira ne'ebé iha Diresaun Nasional Terras Propriedades (DNTP) tanba deklarasaun ne'ebé MJ lansa ne'e ho faktus," dehan deputadu CNRT iha plenária PN, Segunda (21/10/2019).
Nia husu bainhira loos mak MJ Carceres sobu mafia tanba tempu kleur ona.
Deklarasaun ne'ebé MJ lansa hodi halo sosiedade tomak hein ne'e sai hanesan mehi ne'ebé lakon derepente de'it iha tempu hakfodak. Tanba ne'e MJ kontinua deklara ba públiku katak "tempu sei to'o, imi sei hatene,".