KHUNTO Duun VIII Governu Benefisiu de’it PLP

Deputadu ho deputada sira iha Plenaria Parlamentu Nasional Deputadu ho deputada sira iha Plenaria Parlamentu Nasional foto especial

Tempotimor (Dili)-Partidu Kmanek Haburas Unidade Nasional Timor Oan (KHUNTO) deklara governasaun daualu ne’ebé lidera husi Primeiru Ministru Taur Matan Ruak benefenisia de'it Partidu Libertasaun Popular (PLP) tanba okupa hotu kargu sira iha governu.

Deputada Bankada KHUNTO iha Parlamentu Nasionál Olinda Guterres hatete, politikamente membru governu ne’ebé seidauk kompletu fó marjin boot liu ba PLP hodi assume pasta hotu iha ministériu ne’ebé loloos ema CNRT ho KHUNTO nian.

"Politikamente membru governu la kompletu husi KHUNTO no CNRT ne'e fó marjen boot ba PLP hodi asume pasta hotu ministériu ne'ebé tuir loloos KHUNTO no CNRT. Tanba benefisia polítika ne'e fó benefisiu ba PLP de'it, la'os ba CNRT no KHUNTO," dehan fundadora Partidu KHUNTO ne’e iha PN, Segunda (21/10/19)

Nia dehan, bainhira forma bloku Aliansa Mudansa ba Progresu (AMP), iha akordu ne’ebé hatete lider masimu partidu PLP, CNRT no KHUNTO sei hasoru malu kada fulan.

"Uluk maun boot na'in tolu promete iha AMP nia oin katak kada fulan, maun boot na'in tolu iha enkontru, maibé to'o agora la akontese," dehan Olinda.

Liga ba membru governu pendente, fundadora KHUNTO ne'e hatete, VIII Governu ne'e nu’udar sosiu, tanba ne'e KHUNTO iha direitu troka nia ema sira ne’ebé Prezidente Repúblika rekuza hodi fó pose.

"VIII governu ida ne'e sosiu husi partidu tolu hanesan CNRT, PLP no KHUNTO, maibé KHUNTO lakohi sai vítima ba prosesu dezenvolvimentu iha rai ida ne'e nian. Tanba ne'e KHUNTO iha direitu atu troka nia ema ne'ebé iha konfiansa ba serbisu hodi lori dezenvolvimentu nasaun ba oin," nia dehan.

Rate this item
(10 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.