Hanesan públiku hatene, iha 30 Jullu 2019, Mari Alkatiri nia mandate nu’udar Prezidente Autoridade Rejiaun Administrativu Espesial Oecusse-Ambeno (RAEOA) - ZEESM remata ona, no governu deside hodi fó fiar ba Arsenio Bano sai nu’udar Prezidente Interinu RAEOA-ZEESM durante loron 120.
Maske loron 120 besik remata ona, maibé to’o ohin loron governu seidauk anunsia ba públiku kona-ba figura ne’ebé atu sai Prezidente RAEOA-ZEESM.
Ba kestaun ida ne’e, deputada husi Bankada CNRT Lucia Taeki husu ba governu atu fó sai ona figura ne’ebé sei sai Prezidente RAEOA-ZEESM.
"Ohin loron 21 Outubru, ha'u husu prezidente autoriedade RAEOA bainhira mak hetan nomeiasaun, tanba loron 120 ne'e mós besik hotu ona, agora se governu hatan mak tempu badak, tempu badak hela de'it, agora ha’u husu, badak ne'e fulan ida ka semana ida ka loron ida ka oras ida?," dehan Deputada Lucia iha plenária Parlamentu Nasional, Segunda (21/10/19).
Deputada ne’e dehan, nu’udar reprezentante povu, hakarak husu tanba povu lakohi ona rona tan governu dehan tempu badak.
"Ha'u husu tanba povu Oé-Cusse lakohi rona tan governu dehan tempu badak, tempu badak," nia afirma.
Hatan ba kestaun ne’e, Ministru Reforma Lejislativa Asuntu Parlamentar (MRLAP) Fidelis Manuel Leite Magalhães husu atu deputadu sira ne’ebé hakarak hatene informasaun bele koalia direita ho Primeiru Ministru Taur Matan Ruak.
"Distinta deputada ne'ebé ohin halo pergunta, liu-liu kona-ba desizaun polítika, liu-liu kona-ba Oé-Cusse nian. Bainhira distintu deputadu no deputada see-see de'it mak hakarak hasoru direta ho Primeiru Ministru (PM) bele ko'alia ho ha'u par ha'u hato'o ba sua exelénsia,” dehan Ministru Fidelis.
