Prezidente PN ne'e dehan, governu tenke halo ona politika ida ho seriu atu rezolve problema ne'ebé vitima insendiu sira hasoru, liu-liu oinsa atu sira labele sai vitima dala ida tan iha tempu udan.
"Ha'u hanoin ida ne'e grave tebes no sujere ba governu tenke halo ona politika ida ho seriu par atu nune'e oinsa atende ba vitima sira liu-liu tanbá sira ne'ebé ahi haan uma ne'e udan besik ona Novembru ou Dezembru sira ne'e sei laiha fatin par atu hela," dehan Arão iha PN, Sesta (26/10/19).
Nia mós deklara katak tuir relatoriu ne'ebé komisaun F hatama kuaze uma-kain 600 mak sai vitima. Tan ne'e tenke iha desizaun lalais hodi hatan.
"Tanbá ahi haan uma to'o 200 ou 300 no anin boot sobu tan no total husi relatoriu ne'ebé komisaun F ba vizita iha semana hirak liu ba iha munisipiu 4, besik uma 600 mak hetan destroi, seidauk tan foti akontesimentu iha Baukau no Ainaru nian. Buat sira ne'e hotu seidauk no ida ne'e hatudu katak situasaun ne'e grave tebes no presiza atendimentu emerjensia ba primeiru faze hanesan hahaan no segundu tenke apoiu material konstrusaun uma."
Karik governu laiha meius ba konstrui uma, nia dehan, tenke aranja kalen ho material hodi fahe ba vitima sira atu ida-idak bele harii sira-nia uma.
"Par bele iha uma ida par sira hola mahon kuandu udan to'o no ida ne'e mak ha'u hanoin solusaun importante tebes hanesan solusaun kurtu prazu ba situasaun ne'e".