Re-verikasaun ne'e hahú husi Suku Abafala Postu Kelikai to'o área Defalasi Suku Nahareka Postu Ossu, ne’ebé ho kilo-metru 28.
"Re-verifikasaun, tanba data iha tiha ona, ita nia design (estrada Kelikai ba Ossu) iha tiha ona, ita tauk tempu mais avansadu keos ida, uma ruma mosu fali, ida ne'e mak sira ba re-verifika fali, atu haree update fila-fali," dehan Diretór servisu obras públika Baukau, Pedro Alexandre Guterres via telefone, tersa (02/08).
Konstrusaun ba estrada refere dadaun iha hela prosesu aprovizionamentu no tuir planu iha fulan-setembru tinan-2022 hetan ona rezultadu final.
Administradór Postu Administrativu Kelikai, Mateus Soares Cabral, haktuir, ékipa tekníku halo ona re-verikasaun hodi hato'o dadus ba nasionál hafoin halo públikasaun no implementa servisu iha fulan-setembru ka outumbru tinan-2022 nia laran.
"Ne'e nesesidade duni, konsidera estrada rejional, tanba liga ho Munisípiu Vikeke mai Baukau bele fasilita movimentu komunidade lori produtu ba merkadu," dehan nia
Konstrusaun estrada diresaun Postu Kelikai-Ossu remata, sei fasilita komunidade husi Suku 15 iha Kelikai hamutuk 29.000 inklui Suku seluk husi Ossu Vikeke, tanba ne'e husu Governu atu aselera prosesu. (*)