Tempotimor (Dili) – Membru Governu na'in 9 ne'ebé to'o ohin loron seidauk hetan pose, tuir Prezidente Repúblika, Francisco Guterres Lú Olo, nu'udar problema Governu Aliansa Mudansa ba Progresu (AMP) ninian.

“Kona-ba ministru sira ne'ebé la hetan pose, ne'e problema sira nian. Ha'u labele ko'alia konaba ida ne'e. Tanba, ne'e AMP. CNRT, KHUNTO no PLP nia problema,” hatete PR Lú Olo bainhira remata Misa Jubileu Extraordinariu no tinan 30 Amu Papa João Paulo II vizita Timor-Leste (TL) iha Tasitolu, Kuarta (30/10/19).

Kona-ba sei karik AMP troka sira-nia membru Governu indijitadu, bele hakotu impase polítika iha rai laran?

"Ne'e desizaun sira-nia oinsá? Ha'u seidauk hatene kona-ba ida ne'e. Nu'udar Prezidente Repúblika iha opiniaun no ideia duni, para atu bele halibur ho se de'it atu bele ko'alia kona-ba destinu TL nian. Ne'e, sei iha tempu para ko'alia," afirma PR Lú Olo.

Hatán ba deklarasaun Primeiru Ministru kona-ba Eleisaun Antesipada (EA), PR Lú Olo hatete EA akontese ona iha 2018.

"Eleisaun antesipada ne'e, Prezidente Repúblika halo tiha ona iha 2018. Ne'ebé, povu fó  votus maioria ba AMP hodi manan iha eleisaun ne'e. Ha'u respeita tebes, povu nia votus ne'ebé fó ba AMP," dehan xefi estadu.