Tempotimor (Dili) – Ministru Negósiu Estranjeiru no Kooperasaun (MNEK), Dionísio Babo Soares katak, fatin ba embaixada Timor-Leste nian iha estranjeiru kontinua aluga. Maibé, presiza aumenta osan.

"Ita labele sosa fatin embaixada nian iha rai liur. Ita aluga nafatin de'it. Sei aluga nafatin de'it, maibé osan tenke aumenta," dehan MNEK, Dionísio Babo Soares iha Parlamentu Nasionál, Kuarta (30/10/19).

Nia afirma, tuir loloos tinan 2020 atu iha tan embaixada foun iha India. Maibé, Primeiru Ministru husu atu pendente.

"Tuir loloos iha tinan 2020 atu halo tan embaixada ida iha India. Maibé, bainhira ha'u lori ba Konsellu Ministru (KM) husu atu suspende lai. Depois, ita mós taka ona  ita nia embaixada rua hanesan iha Pritória no Luanda," dehan Babo.

Rekruta Diplomata

Iha sorin seluk, MNEK hatete, iha tinan oin sei halo rekrutamentu tan diplomata foun besik 50.

"Ami hanoin katak, iha tinan oin sei rekruta diplomata foun. Se bele, to'o 50 hanesan ne'e. Tanba, diplomata tuan sira ne'e, balun reforma ona. Balun katuas ona maibé seidauk tama reforma. Ita tenke prepara ba tinan lima oin mai," esplika Babo.

MNEK ne'e dehan, programa prioridade ba tinan 2020 ne'ebé kontinua prioridade mós mak ASEAN no seluk tan.

"ASEAN ne'e kontinua prioridade. CPLP nian no multilaterál sira seluk, depois kapasitasaun diplomata internu, ne'ebé prioridade mós," nia afirma.