Maijor Jeneral Lere dehan, politiku-nain sira iha Timor Leste halo politika tanba hada’u kadeira hodi buka osan.
Tan ne’e, tuir Lere la presiza iha tan EA tanba bainhira realiza EA sei vota ba ema ne’ebé hanesan de’it no la vota fali ba ema seluk.
"A não ser (husi) partidu 20, ida tan mak mosu tan, entaun ida ne'e oin seluk mais partidu mak ida ne'e nafatin ita lakon tempu de’it," dehan Lere iha Palasiu Prezidensial Bairo-pite, Kuarta (06/11/19).
Maske la konkorda, Lere dehan, ida ne’e nu’udar desizaun politika Prezidente Repúblika, Governu no Parlamentu Nasional.
“Eleisaun antesipada ou lae ne'e problema sira nian, problema mak estabilidade tanba estabilidade iha mak sei iha dezenvolvimentu no eleisaun mós sei la’o di’ak”.
"Ita haree katak see mak ukun Timor, ne'e ami mai husi ailaran mak ukun, laos ema seluk, sira iha okos ne'e soldadu, ami husi ailaran mak manda sira, maibé dala-ruma ema soldadu mak manobra fali ami, karik ne'e mak agora impase politika ne'e lao hela", dehan Lere.
Tan ne’e, Lere husu ba luta-nain sira no sira ne’ebé terus ba rai ida ne’e atu fó liman ba malu no lalika rona demais ema ne’ebé uluk la gosta ukun an.
“Tanb agora ne'e ema halo politika ne'e tanba osan, hada’u kadeira par hetan osan, ema halo politika ne'e laos arbiru de’it, hanesan atu naran boot ne'e mós tenke bosok uluk lai,” Lere afirma.