"Mai hasoru prezidente repúblika, hodi halo breefing fahe informasaun oituan kona-bá servisu sira ne'ebé hala'o husi tinan 2015, iha reforma jestaun finansa públika, mudansa introdusaun orsamentu bazeia ba programa, ne'ebé governu introdúz até a data," dehan koordenadora ANPMA Brigida Soares iha palasiu PR, Bairo-Pite, sesta (16/09).
Pontu prinsipal kona-ba servisu sira ne'ebe hala'o ona dezde tinan 2015, bainhira harii UPMA depois muda fali ba Ajénsia, ne'ebe servisu atu halo mudansa ba modelu orsamentu bazeia ba programa.
Nune'e mos dezenvolve sistema planeamentu monitorizasaun avaliasaun tema informátika, katak "dalan ba futuru" ida ne'e sei kontrola gastu sira ne'ebé ministeriu sira planea kada tinan, nomos sistema ho modelu orsamentu ida-ne'e fo dalan ba ANPMA atu halo monitorizasaun no fornese informasaun ba lideransa sira ne'ebe kaer desizaun atu foti desizaun ba planu sira tinan tuir mai ne'e tenke bazea duni ba nesesidade ne'ebé komunidade no povu sira iha.
Parte ANPMA mos hato'o preokupasun balun ba Xefe Estadu ligadu ho implementasun programa bazeia ba orsamentu durante ne'e ladun la'o ho di'ak.
Tanba, situasaun ne'ebe governu enfrenta husi mandatu ida ba mandatu seluk no impase politika ne'ebe la'o, pandemia covid-19 ho dezastre natural, buat hirak ne'e la fo dalan atu bele implementa programa sira la'o ho di'ak tuir planu estratéjiku dezenvolvimentu nasionl (PEDN) nomos objetivu dezenvolvimentu sustentavél ne'ebé iha.
Aleinde ba modelu orsamerntu foun ida-ne'e parte ANPMA hanoin katak, presiza halo formasaun barak ba instituisaun estadu sira ne'ebe nia orsamentu ne'e kada tinan aloka husi Orsamentu Jeral Estadu (OJE) atu implementa modelu orsamentasaun kada programa ne'e ho di'ak.
"Kapasidade ita-nia entidade sira ho modelu orsamentu foun ne'ebe ita introduz, presiza tempu hodi halo kapasitasaun no halo formasaun barak liután atu nune'e ba oin, ninia implementasun modelu orsamentasaun ne'e bele la'o," nia hatete. (*)