Iha Kinta (07/11) hala'o misa funebre iha igreja Balide molok lori ba haloot iha Jardin Eroi Likisa.

Padre Graciano Baros ne'ebé lidera misa funebre iha ninia omilia hatete, ema hotu moris iha mundu ne'e hanesan imajen Maromak nian ne'ebé ho grasa oioin, hodi lao hale'u fatin hotu halo buat hotu maibé loron ida sei mate ho rai kuak ida no kaisaun ida.

“Ohin ita selebra misa ikus ba Aquita Tama Laka hanesan maun, alin, oan, no hanoin fali saida mak nia kontribui ona ba nasaun ida ne’e, hanesan ema ko'alia katak iha ema na'in tolu tama komarka kleur liu ida mak nia no nia kontribuisaun ne'ebé fó hodi salva ema lubun ida hodi ba moris di'ak, no mós ba ita-nia rain no povu ida ne'e,” dehan padre Graciano iha ninia omilia.

“Ohin ita haree Aquita Tama Laka mate iha Likisa pergunta mai ita, tanba moris iha mundu destinansaun ikus mak mate, ba ita sira ne'ebé fiar iha Maromak destinasaun ne'e sei ba lalehan.”

Hafoin misa, mate-isin Saudozu Aquita Tama Laka sei lori ba vizita, sede Partidu Sosialista Timor (PST), hafoin lori ba saudozu nia hela fatin iha Aipelo-Likisa vizita molok lori ba haloot iha semiteriu nasional Likisa.