"Rezultadu votasaun afavor 40, kontra 0, abstensaun 21, Orsamentu Jerál Estadu ba Sekretária Estadu Koopertiva pasa," Prezidente Parlamentu Nasionál (PPN), Aniceto Longuinhos Guterres Lopes, anúnsia rezultadu votasaun iha diskusaun no aprovasaun espesialidade ba proposta-lei OJE 2023 iha plenaria PN, segunda (14/11).
Purtantu bazeia ba tetu proposta OJE 2023 ne'ebe aloka ba SEKOOP ne'e ho montante hamutuk $4,914.715, no sei finansia ba programa rua.
Dahuluk, programa Dezenvolvimentu Rural no Urbanu ho montante US$2,348.340, daruak programa Boa Governasaun no Jestaun Instituisional US$2,566.375.
Purtantu durante iha deskusaun no aprovasaun ba orsamentu SEKOOP nian, deputadu sira mos halo votasaun ba proposta númeru 25 ne'ebé propoin husi Proponente deputada Bankada CNRT, Maria Fernanda Lai atu hasai no redus orsamentu SEKOOP nian.
Maibé, rezultadu votasaun ba proposta alterasaun refere, afavor 19, kontra 32, abstensaun 9, nune'e labele pasa. (*)