"Ajenda anúnsia admisaun no baixa ba komisaun A trata asuntu justisa no konstituisionál, kona-ba proposta lei númeru 47/V (5a), lei prezidensiál no protukolu estadu, tanba ne'e, ha'u konvida prezidente komisaun A atu hakat mai simu proposta de lei ne'ebé mak iha", dehan Vise Prezidente PN, deputada Maria Angelina Sarmento iha plenária PN, segunda (21/11).
Entretantu, Governu liuhusi Reuniaun Konsellu Ministru (KM) extraordináriu iha loron 5 fulan-novembru 2021, aprova ona alterasaun ba projetu lei prezidénsia no protokolu estadu, ne'ebe aprezenta husi Ministra Negósius Estranjeiru no Kooperasaun, Adaljiza Albertina Xavier Reis Magno.
Projetu proposta lei ne'e sei define rejime jurídiku ida kona-ba organizasaun serimónia ofisiál sira, ne'ebé regula relasionamentu protokolár husi entidade públika sira iha serimónia estadu no disiplina funsionamentu protokolu estadu nian.
Nune’e, governu liu husi Konsellu Ministru mós autoriza Ministra Negósiu Estranjeiru no Kooperasaun, Adaljiza Albertina Xavier Magno, atu selebra akordu-kuadru asisténsia ho governu Repúblika Korea.
Akordu ne'e, atu estabelese baze legál ida ba parseria ne'ebé hakarak diversifika no bele tahan ba tempu naruk, ne'ebé permite ba futuru realizasaun akordu kona-ba programa no projetu espesífiku sira, iha ámbitu konsesaun ajuda sira ba setór oioin husi atividade sira Timor-Leste nian, hodi fasilita kooperasaun husi entidade nasionál sira ho ajénsia Kooperasaun Internasionál Korea. (*)