Iha 12 Novembru 1991, joven Timor Leste hatudu ninia unidade, sakrifisiu no dedikasaun atu hakotu korente kolonializmu.

Maibé, hafoin ukun rasik an, joven Timor Leste hahú fahe malu. Fator boot ne’ebé hafahe joven sira ne’e mak grupu ka organizasaun artemarsiais.

Liu husi selebrasaun Masakre Santa Kruz ba tinan 28, Prezidente Komite 12 Novembru Grigorio Saldanha husu ba juventude sira atu hadook an husi violensia hodi bele kontribui ba dezenvolvimentu nasaun nian.

"Husu ba juventude no estudante sira respeita lei no orden i hapara ona violensia tanba envolve violensia iha buta tolu ne'ebé ita sempre hetan: ba ospital, tama kadei, no mate," dehan Grigorio liu husi nia deskursu iha semiteriu Santa Kruz, Tersa (12/11/19).

Tuir nia, juventude mak hanesan luta kontinuador no xave ba dezenvolvimentu tan ne'e presiza hakribi ona violensia.

Bainhira juventude envolve an iha violensia ne’ebé ikus mai hetan kanek no mate, Timor Leste lakon no familia hotu triste.

"Ita-nia eroi sira-nia mate hodi hetan ukun rasik an, agora juventude kontinuador sira presiza valoriza sira-nia mate liu husi kontribui ba prosesu dezenvolvimentu nasaun Timor Leste nian," nia apela.