Tuir informasaun ne’ebé www.tempotimor.com asesu iha pájina gabineti Ministru Obras Públikas (MOP), Abel Pires da Silva katak, loron 10 fulan-janeiru tinan 2023, MOP ho MPM hala’o ona reuniaun iha salaun reuniaun Gabinete MPM, Fomentu Dili, hodi ko’alia kona-ba kordenasaun servisu.
Reuniaun ne’e, ko’alia liu kona-ba oinsá halo kooperasaun di’ak iha área servisu tékniku liga ho infraestrutura bázika iha Munisípiu Kovalima ne’ebé prejudika prosesu perfurasaun mina iha parte Tasi-Mane liuliu prejudika atividade Timor Gap nian.
"Agradese ba ita-boot sira-nia aprosimasaun, Ministériu ida-ne’e Ministériu tekníku ne’ebé atu serví Ministériu sira hotu no mós ita-nia povu sira liuhosi fornesimentu fasilidade báziku hanesan estrada, ponte, eletrisidade, bee-moos, edifikasaun no ba ida-ne’e ha’u hanoin, ita tuur hamutuk para tekníku sira tau iha meja ita foti desizaun, depois sai ba bele rezolve ona situasaun ne'ebé dada tempu”, dehan MOP
Tanba, parte tékniku, Diretór Nasionál Edifikasaun (DNE), Lino Pereira, prontu atu apoiu servisu sira ne’ebé liga ho servisu infraestrutura liuliu edifikasaun.
Reuniaun ne’e partisipa husi Ministru MOP, Ministru MPM, Diretór Timor Gap, DNE, inklui tékniku sira DNE no Gabinete MOP no MPM. (*)