Ministru Prezidénsia Konsellu Ministru, Fidelis Leite Magalhães esplika, Konsellu Ministrus aprova ona, tuir projetu ne’ebé aprezenta husi Ministru Finansas, alterasaun daruak ba Akordu kontribuisaun finanseira ba objetivu dezenvolvimentu sustentável nian entre Repúblika Demokrátika Timor-Leste no Estadus Unidus Amérika, liuhusi ajénsia USAID, ne’ebé asina ona iha loron 18 fulan-maiu tinan 2021.
Ba akordu ida-ne’e atu haree ba dezenvolvimentu setór naun petrolíferu no reforsu governasaun di’ak ba períodu tinan lima nia llaran husi 2020 to’o 2025.
Iha alterasaun ida-ne’e ho nia objetivu atu aumenta valór kontribuisaun finanseira, ne’ebé sei realiza husi Estadus Unidus Amérika, ho dolar amerikanu millaun 36,6 ba dolar amerikanu millaun 53,6.
Entretantu Konsellu Ministrus aprova ona, tuir mós projetu ne’ebé aprezenta husi Ministru Finansas, alterasaun daualuk ba Akordu kontribuisaun finanseira ba objetivu dezenvolvimentu sustentável sira entre Repúblika Demokrátika Timor-Leste no Estadus Unidus Amérika, liuhusi ajénsia USAID, ne’ebé asina ona iha loron 27 fulan-marsu tinan 2014.
Akordu ida-ne’e ho nia objetivu atu reforsa kapasidade institusionál no umana ba dezenvolvimentu períodu tinan 2014 to’o 2019.
Alterasaun ida-ne’e ho nia objetivu atu revee data ikus akordu nian ba loron 30 fulan-setembru tinan 2025 hodi permite konkluzaun atividade sira ne’ebé finansia husi kontribuisaun finanseira.
Konsellu Ministrus hili Ministru Finansas hodi reprezenta Governu Timor-Leste atu asina akordu ida-ne’e.
Bainhira asina akordu ne’e, Konsellu Ministru hili Ministru Finansas hodi reprezenta Governu Timor-Leste, atu asina akordu sira ne’e. (*)