Situasaun ida ne'e hanesan mós ho situasaun ne'ebé mosu iha konferénsia AMP dahuluk ne'ebé realiza iha Dili iha fulan Juñu 2019. Iha momentu ne'eba, Xanana hili liu atu partisipa iha serimonia aniversariu televizaun privadu ida duke partisipa iha Konferensia AMP.
Notisia Relevante: Konferensia AMP, Xanana Falta, TMR Kampania Programa Governu
Tuit observasaun jornalista Tempotimor.com, Konferensia Daruak AMP ne'ebé hala'o iha Sentru Formasaun Tibar, Sabadu (16/11) tuku 8.30 ne'e la hetan prezensa husi Prezidente CNRT.
Maske Xanana la partisipa iha eventu ne'e maibé lider AMP sira seluk hanesan Primeiru Ministru Taur Matan Ruak, Sekretariu Jeral CNRT Francisco Kalbuadi Lay, Lider Masimu KHUNTO Naimori Bucar, Presidente Parlamentu Nasional Arão Noe, membru governu no deputadu AMP sira kuaze partisipa iha konferensia refere.
Koordenadór AMP Francisco Kalbuadi Lay informa, Xanana Gusmão labele partisipa iha kongresu AMP tanba halo hela vizita ba Kambodia hamutuk ho José Ramos Horta.
Maske Xanana la marka prezensa, maibé Kalbuadi dehan, Xanana nia esperitu hamutuk ho AMP.
Kona-ba objetivu husi konferensia ne’e, Koordenadór AMP ne’e dehan, pontu importante ba konferensia ne’e mak atu konsolida AMP hodi forte no unidu nafatin.
"Ita mai hamutuk iha ne’e atu koalia kona-ba interese estadu, no liu-liu ba interese povu nian. Mais pontu Importante ita atu konsolida AMP hodi forte no unidu nafatin,” deklara Kalbuady iha Kongresu AMP iha Tibar.
Kalbuadi husu ba kuadru partidu politiku tolu iha AMP atu bele kria amizade ne’ebé di’ak liu tan no konfiansa entre sira.
"Iha buat barak mak ha’u atu hato’o. Mais, iha ita-nia konferensia ida ne'e hahú agora, depois de orsida ita rona tiha orientasaun husi Portavos AMP,” dehan nia.